കുവൈത്ത്: കുവൈത്ത് അമീർ ഷെയ്ഖ് മിഷാൽ അൽ അഹ്മദ് അൽ ജാബർ അൽ സബാഹിന്റെ പ്രത്യേക മാപ്പിന്റെ അടിസ്ഥാനത്തിൽ 94 ജയിൽ തടവുകാരെ മോചിപ്പിച്ചതായി ആഭ്യന്തര മന്ത്രാലയം അറിയിച്ചു.
2026 ഒക്ടോബർ 19 തിങ്കളാഴ്ചയാണ് തടവുകാരെ മോചിപ്പിക്കുന്നതിനുള്ള നടപടികൾ പൂർത്തിയാക്കിയത്. അമീറിന്റെ നിർദേശപ്രകാരം പശ്ചാത്താപം പ്രകടിപ്പിച്ച തടവുകാരെ പുനരധിവസിപ്പിക്കുന്നതിനുള്ള പ്രത്യേക പദ്ധതിയുടെ ഭാഗമായാണ് മോചനം.ആഭ്യന്തര മന്ത്രാലയത്തിന് കീഴിലുള്ള പ്രത്യേക സുരക്ഷാ, ജയിൽ പരിഷ്കരണ വിഭാഗമാണ് മോചന നടപടികൾ നടപ്പിലാക്കിയത്.
തടവുകാർക്ക് ജീവിതത്തിൽ പുതിയൊരു അവസരം നൽകുകയും കുടുംബങ്ങളിലേക്ക് മടങ്ങാനും സമൂഹത്തിൽ നല്ല പൗരന്മാരായി ജീവിക്കാനും സാഹചര്യമൊരുക്കുകയുമാണ് അമീറിന്റെ പ്രത്യേക മാപ്പിലൂടെ ലക്ഷ്യമിടുന്നത്.തെറ്റുകൾ തിരുത്തി പുതിയ ജീവിതം ആരംഭിക്കുന്നതിനും സമൂഹത്തിന്റെ പുരോഗതിയിൽ പങ്കാളികളാകുന്നതിനും മോചിതരായവർക്ക് അവസരം ലഭിക്കുമെന്ന് ആഭ്യന്തര മന്ത്രാലയം വ്യക്തമാക്കി.
ജയിൽ തടവുകാരുടെ സ്വഭാവത്തിൽ നല്ല മാറ്റങ്ങൾ കൊണ്ടുവരുന്നതിനും സാമൂഹിക ഉത്തരവാദിത്തബോധം വളർത്തുന്നതിനുമായി വിവിധ പുനരധിവാസ, പരിഷ്കരണ പദ്ധതികൾ തുടരുമെന്നും മന്ത്രാലയം അറിയിച്ചു.കുടുംബബന്ധങ്ങൾ ശക്തിപ്പെടുത്തുന്നതിനും സാമൂഹിക സ്ഥിരത ഉറപ്പാക്കുന്നതിനും ഇത്തരം നടപടികൾ സഹായിക്കുമെന്നാണ് അധികൃതരുടെ വിലയിരുത്തൽ.
