കുവൈറ്റ് സിറ്റി: ജഹ്റ ഗവർണറേറ്റിലെ ഒരു ഷോപ്പിംഗ് സെന്ററിൽ പാർക്കിംഗ് സ്ഥലത്തെച്ചൊല്ലിയുണ്ടായ തർക്കത്തെത്തുടർന്ന് അറുപതുകാരനായ കുവൈറ്റ് സ്വദേശിക്ക് ക്രൂരമായി മർദ്ദനമേറ്റു. വാഹനം നിർത്താനുള്ള സ്ഥലത്തെ ചൊല്ലിയുണ്ടായ തർക്കത്തിനിടെ മൂന്ന് അപരിചിതർ ചേർന്ന് തന്നെ ആക്രമിച്ചതായി കാണിച്ച് വയോധികൻ പോലീസ് സ്റ്റേഷനിൽ പരാതി നൽകി.
ഷോപ്പിംഗ് സെന്ററിന്റെ പാർക്കിംഗ് ഏരിയയിൽ വാഹനം നിർത്താൻ കാത്തുകിടക്കുകയായിരുന്ന തന്റെ വഴി തടസ്സപ്പെടുത്തി മറ്റൊരു വാഹനം വരികയും, അതിലുണ്ടായിരുന്ന മൂന്ന് പേർ പുറത്തിറങ്ങി തന്നോട് തർക്കത്തിൽ ഏർപ്പെടുകയുമായിരുന്നുവെന്ന് പരാതിയിൽ പറയുന്നു. പാർക്കിംഗ് സ്പേസിൽ തങ്ങൾക്കാണ് അവകാശമെന്ന് ആരോപിച്ച് ഇവർ വയോധികനെ അസഭ്യം പറയുകയും ശാരീരികമായി ഉപദ്രവിക്കുകയും ചെയ്ത ശേഷം സംഭവസ്ഥലത്തുനിന്ന് കടന്നുകളയുകയായിരുന്നു.
അക്രമികൾ സഞ്ചരിച്ചിരുന്ന വാഹനത്തിന്റെ നമ്പർ ഇരയായ വയോധികൻ പോലീസിന് കൈമാറിയിട്ടുണ്ട്. ഇത് ഉപയോഗിച്ച് വാഹനത്തിന്റെ ഉടമയെയും സംഭവസമയത്ത് വാഹനത്തിലുണ്ടായിരുന്ന മൂന്ന് പേരെയും പോലീസ് തിരിച്ചറിയുകയും ചോദ്യം ചെയ്യാനായി വിളിച്ചുവരുത്തുകയും ചെയ്തു. കേസിൽ കൂടുതൽ നിയമനടപടികൾ സ്വീകരിക്കുന്നതിനായി ബന്ധപ്പെട്ട അധികാരികൾക്ക് കൈമാറി.
