കുവൈറ്റ് സിറ്റി: തൊഴിൽ വിപണിയിലെ നിരീക്ഷണവും സാമൂഹിക പങ്കാളിത്തവും വർദ്ധിപ്പിക്കുന്നതിനായി പബ്ലിക് അതോറിറ്റി ഫോർ മാൻപവർ ‘സഹൽ’ ആപ്ലിക്കേഷൻ വഴി ‘റിപ്പോർട്ട് മി’ എന്ന പേരിൽ പുതിയ സേവനം ആരംഭിച്ചു. തൊഴിൽ മേഖലയിലെ നിയമലംഘനങ്ങൾ ഡിജിറ്റലായി അധികൃതരെ അറിയിക്കാൻ സ്വദേശികൾക്കും വിദേശികൾക്കും ഈ സേവനത്തിലൂടെ സാധിക്കും.
വിവരങ്ങൾ കൈമാറുന്ന വ്യക്തികളുടെ സ്വകാര്യതയും വിവരങ്ങളുടെ രഹസ്യസ്വഭാവവും പൂർണ്ണമായും ഉറപ്പുനൽകുന്നതാണ് ഈ സംവിധാനം. നിയമലംഘനങ്ങൾ വേഗത്തിൽ കണ്ടെത്തി ആവശ്യമായ നടപടികൾ സ്വീകരിക്കാനും, തൊഴിലാളികളുടെയും തൊഴിലുടമകളുടെയും അവകാശങ്ങൾ സംരക്ഷിക്കാനും, തൊഴിൽ നിയമങ്ങൾ പാലിക്കപ്പെടുന്നുണ്ടെന്ന് ഉറപ്പുവരുത്താനും ഇത് സഹായിക്കും.
പൊതുജനങ്ങൾക്ക് സർക്കാർ ഏജൻസികളുമായി സഹകരിച്ച് തൊഴിൽ-മാനവിക വിഷയങ്ങളിൽ പങ്കാളികളാകാൻ ഈ സേവനം അവസരമൊരുക്കുമെന്ന് പബ്ലിക് അതോറിറ്റി ഫോർ മാൻപവർ പബ്ലിക് റിലേഷൻസ് ആൻഡ് മീഡിയ ഡയറക്ടർ മുഹമ്മദ് അൽ-മുസൈനി പറഞ്ഞു. പരാതി നൽകുന്നവരുടെ വിവരങ്ങൾ രഹസ്യമായി സൂക്ഷിക്കുമെന്നും ലഭിക്കുന്ന പരാതികളിൽ അധികൃതർ അടിയന്തര നടപടി സ്വീകരിക്കുമെന്നും അദ്ദേഹം എടുത്തുപറഞ്ഞു.
