കുവൈത്ത്: അറബ് ലീഗിൽ അംഗങ്ങളായ 22 രാജ്യങ്ങളുടെ പാസ്‌പോർട്ട് റാങ്കിങ്ങിൽ കുവൈത്തിന് മൂന്നാം സ്ഥാനം. പാസ്‌പോർട്ടുകളുടെ യാത്രാസൗകര്യങ്ങൾ വിലയിരുത്തുന്ന സ്വതന്ത്ര ഗവേഷണ സ്ഥാപനമായ ‘പാസ്‌പോർട്ട് റിപ്പോർട്ട്സ്’ ഒക്ടോബർ 13-ന് പുറത്തുവിട്ട കണക്കുകളിലാണ് കുവൈത്ത് ഈ നേട്ടം കൈവരിച്ചത്. ആഗോള റാങ്കിങ്ങിൽ കുവൈത്ത് പാസ്‌പോർട്ട് 85-ാം സ്ഥാനത്താണ്.
അറബ് രാജ്യങ്ങളിൽ യുഎഇയാണ് ഒന്നാം സ്ഥാനത്ത്. ഖത്തർ രണ്ടാം സ്ഥാനവും കുവൈത്ത് മൂന്നാം സ്ഥാനവും സ്വന്തമാക്കി. സൗദി അറേബ്യ നാലാം സ്ഥാനത്തും ബഹ്റൈൻ അഞ്ചാം സ്ഥാനത്തും ഒമാൻ ആറാം സ്ഥാനത്തുമാണ്.മൊറോക്കോ ഏഴാം സ്ഥാനത്തും ടുണീഷ്യ എട്ടാം സ്ഥാനത്തും മൗറിറ്റാനിയ ഒമ്പതാം സ്ഥാനത്തും അൾജീരിയ പത്താം സ്ഥാനത്തുമാണ്.പട്ടികയിൽ ഇറാഖ് 21-ാം സ്ഥാനത്തും സിറിയ അവസാന സ്ഥാനത്തുമാണ്.
മുൻകൂർ വിസയില്ലാതെ യാത്ര ചെയ്യാൻ കഴിയുന്ന രാജ്യങ്ങൾ, ഇലക്ട്രോണിക് ട്രാവൽ ഓതറൈസേഷൻ വഴി പ്രവേശനം ലഭിക്കുന്ന രാജ്യങ്ങൾ, വിമാനത്താവളത്തിൽ എത്തിയശേഷം വിസ ലഭിക്കുന്ന രാജ്യങ്ങൾ എന്നിവയുടെ എണ്ണം അടിസ്ഥാനമാക്കിയാണ് റാങ്കിങ് തയ്യാറാക്കുന്നത്.ലോകത്തെ 199 രാജ്യങ്ങളുടെ പാസ്‌പോർട്ടുകളെക്കുറിച്ചുള്ള വിവരങ്ങൾ 34 ഭാഷകളിൽ പ്രസിദ്ധീകരിക്കുന്ന സ്വതന്ത്ര ഗവേഷണ പ്ലാറ്റ്‌ഫോമാണ് പാസ്‌പോർട്ട് റിപ്പോർട്ട്സ്.
അതേസമയം, വിവിധ സ്ഥാപനങ്ങൾ വ്യത്യസ്ത മാനദണ്ഡങ്ങൾ ഉപയോഗിക്കുന്നതിനാൽ പാസ്‌പോർട്ട് റാങ്കിങ്ങുകളിൽ വ്യത്യാസമുണ്ടാകാം. 2026 ജനുവരിയിൽ പ്രസിദ്ധീകരിച്ച ഹെൻലി പാസ്‌പോർട്ട് ഇൻഡക്സിൽ കുവൈത്ത് ആഗോളതലത്തിൽ 50-ാം സ്ഥാനത്തായിരുന്നു.വിസ നിയമങ്ങളിലും രാജ്യങ്ങളുടെ പ്രവേശന നിബന്ധനകളിലും മാറ്റങ്ങൾ ഉണ്ടാകുന്നതിനാൽ യാത്രയ്ക്ക് മുമ്പ് ബന്ധപ്പെട്ട രാജ്യത്തിന്റെ ഔദ്യോഗിക വിസ വ്യവസ്ഥകൾ പരിശോധിക്കണമെന്നും റിപ്പോർട്ട് ഓർമ്മിപ്പിക്കുന്നു.
