കുവൈറ്റ് സിറ്റി: സർക്കാർ സ്കൂളുകളിലെ അധ്യാപകർ, അഡ്മിനിസ്ട്രേറ്റീവ് ജീവനക്കാർ, സർവീസ് ജീവനക്കാർ, വിദ്യാർത്ഥികൾ എന്നിവരുടെ വസ്ത്രധാരണം, ബാഹ്യരൂപം, പെരുമാറ്റച്ചട്ടങ്ങൾ, പ്രൊഫഷണൽ ചുമതലകൾ എന്നിവ ക്രമീകരിക്കുന്നതിന് സമഗ്രമായ പുതിയ നിയമാവലി നടപ്പിലാക്കാൻ കുവൈറ്റ് വിദ്യാഭ്യാസ മന്ത്രാലയം ഒരുങ്ങുന്നു.
നിയമങ്ങൾ പ്രാബല്യത്തിൽ വരുത്തുന്നതിന് മുന്നോടിയായി, അഭിപ്രായങ്ങളും നിർദ്ദേശങ്ങളും സമാഹരിക്കുന്നതിനായി ഈ കരട് നിയമാവലി വിദ്യാഭ്യാസ മേഖലയിലെ ജീവനക്കാർക്കിടയിൽ വിതരണം ചെയ്തിട്ടുണ്ട്.പ്രൊഫഷണൽ നിലവാരമുള്ളതും മാന്യവുമായ വസ്ത്രധാരണം പാലിക്കാൻ അധ്യാപകരും അഡ്മിനിസ്ട്രേറ്റീവ് ജീവനക്കാരും ബാധ്യസ്ഥരായിരിക്കും. പുരുഷ ജീവനക്കാർ കുവൈറ്റിന്റെ പരമ്പരാഗത വസ്ത്രമായ ഡിഷ്ദാഷ, ഘുത്ര, അഗാൽ എന്നിവയോ അല്ലെങ്കിൽ ഔദ്യോഗിക formal/semi-formal സ്യൂട്ടുകളോ ധരിക്കണം. വനിതാ ജീവനക്കാർ വിദ്യാഭ്യാസ അന്തരീക്ഷത്തിന് അനുയോജ്യമായ മാന്യവും ഔദ്യോഗികവുമായ വസ്ത്രങ്ങൾ ധരിക്കേണ്ടതുണ്ട്.
വൃത്തിയുള്ളതും മാന്യവുമായ വസ്ത്രങ്ങൾ നിർബന്ധമാക്കുമ്പോൾ തന്നെ സ്പോർട്സ്വെയറുകൾ, ടൈറ്റ് വസ്ത്രങ്ങൾ, ചെറിയ വസ്ത്രങ്ങൾ, കീറിയ വസ്ത്രങ്ങൾ എന്നിവ ഉപയോഗിക്കുന്നത് വിലക്കിയിട്ടുണ്ട്. ശരീരത്തിൽ ടാറ്റൂ ഉള്ളവർ അത് മറച്ചുപിടിക്കുകയും വേണം. എന്നാൽ കായിക അധ്യാപകർക്ക് ഈ കായികവസ്ത്ര വിലക്കിൽ നിന്ന് ഇളവ് അനുവദിച്ചിട്ടുണ്ട്.
