കുവൈറ്റ് സിറ്റി: രാജ്യത്ത് ട്രാഫിക് സുരക്ഷ ഉറപ്പുവരുത്തുന്നതിനായി ജനറൽ ട്രാഫിക് ഡിപ്പാർട്ട്മെന്റ് കഴിഞ്ഞ ആഴ്ച നടത്തിയ വ്യാപക സുരക്ഷാ പരിശോധനകളിൽ 28,890 ട്രാഫിക് നിയമലംഘനങ്ങൾ രജിസ്റ്റർ ചെയ്തു. അപകടകരമായി വാഹനമോടിച്ച 25 പേരെ അറസ്റ്റ് ചെയ്ത പോലീസ്, 241 കാറുകളും രണ്ട് മോട്ടോർ സൈക്കിളുകളും കസ്റ്റഡിയിലെടുത്ത് ട്രാഫിക് ഗാരേജിലേക്ക് മാറ്റി. ഡ്രൈവിംഗ് ലൈസൻസില്ലാതെ വാഹനം ഓടിച്ചതിന് പിടിക്കപ്പെട്ട 8 പ്രായപൂർത്തിയാകാത്ത കുട്ടികളെ ജുവനൈൽ പ്രോസിക്യൂഷന് കൈമാറുകയും ചെയ്തിട്ടുണ്ട്.
കുവൈറ്റിലെ ആറ് ഗവർണറേറ്റുകളിലും ട്രാഫിക് ഓപ്പറേഷൻസ്, ട്രാഫിക് ഇൻവെസ്റ്റിഗേഷൻ വിഭാഗങ്ങളുടെ നേതൃത്വത്തിലാണ് പരിശോധനകൾ ശക്തമാക്കിയത്. കഴിഞ്ഞ ആഴ്ചയിൽ മാത്രം വാഹനാപകടങ്ങളും അത്യാഹിതങ്ങളും ഉൾപ്പെടെ 3,030 സന്ദേശങ്ങളാണ് ട്രാഫിക് പട്രോൾ വിഭാഗത്തിന് ലഭിച്ചത്. ഇതിൽ 1,315 കൂട്ടിയിടി അപകടങ്ങളും പരിക്കുകൾ റിപ്പോർട്ട് ചെയ്ത 182 അപകടങ്ങളും ഉൾപ്പെടുന്നു.
ട്രാഫിക് പരിശോധനകൾക്കിടയിൽ വിവിധ കേസുകളിൽ പ്രതികളായ 29 സുരക്ഷാ തിരച്ചിൽ പുള്ളികളെ പോലീസ് പിടികൂടി ബന്ധപ്പെട്ട വകുപ്പുകൾക്ക് കൈമാറി. കൂടാതെ, ഇഖാമ (താമസരേഖ) കാലാവധി കഴിഞ്ഞ 35 വിദേശികളെയും തിരിച്ചറിയൽ രേഖകൾ കൈവശമില്ലാത്ത 5 പേരെയും പോലീസ് സംഘം അറസ്റ്റ് ചെയ്തിട്ടുണ്ട്. നിയമലംഘനങ്ങൾ തടയുന്നതിനായി വരും ദിവസങ്ങളിലും പരിശോധന കർശനമായി തുടരുമെന്ന് അധികൃതർ വ്യക്തമാക്കി.
