കുവൈത്ത് സിറ്റി: അലി സബാഹ് അൽ-സലേം, അൽ-നഹ്ദ എന്നിവിടങ്ങളിൽ രണ്ട് വ്യത്യസ്ത സംഭവങ്ങളിലായി രണ്ട് ശ്രീലങ്കൻ വനിതകളെ മരിച്ച നിലയിൽ കണ്ടെത്തിയ സംഭവത്തിൽ കുവൈറ്റ് അധികൃതർ അന്വേഷണം ആരംഭിച്ചു. ഇരു സംഭവങ്ങളിലും അസ്വാഭാവിക മരണത്തിന് കേസെടുത്തിട്ടുണ്ട്.
അലി സബാഹ് അൽ-സലേമിലെ ഒരു വീടിന്റെ മുകൾനിലയിലെ സ്റ്റോറൂമിൽ 1988-ൽ ജനിച്ച ശ്രീലങ്കൻ യുവതിയെ മരിച്ച നിലയിൽ കണ്ടെത്തിയതായി ഒരു കുവൈറ്റ് പൗരനാണ് അധികൃതരെ അറിയിച്ചത്. വിവരമറിഞ്ഞ് സ്ഥലത്തെത്തിയ അഹ്മദി പബ്ലിക് പ്രോസിക്യൂഷന്റെ ഉത്തരവ് പ്രകാരം കേസ് രജിസ്റ്റർ ചെയ്യുകയും മൃതദേഹം ഫോറൻസിക് വകുപ്പിലേക്ക് മാറ്റുകയും ചെയ്തു. മരണകാരണം വ്യക്തമാക്കുന്നതിനായി ക്രിമിനൽ ഇൻവെസ്റ്റിഗേഷൻ ഡിപ്പാർട്ട്മെന്റ് അന്വേഷണം ആരംഭിച്ചിട്ടുണ്ട്.
മറ്റൊരു സംഭവത്തിൽ, അൽ-നഹ്ദ പ്രദേശത്ത് 1999-ൽ ജനിച്ച മറ്റൊരു ശ്രീലങ്കൻ യുവതിയുടെ മരണവുമായി ബന്ധപ്പെട്ട് ജഹ്റ പബ്ലിക് പ്രോസിക്യൂഷന്റെ നിർദ്ദേശപ്രകാരം മൃതദേഹം ഫോറൻസിക് വിഭാഗത്തിന് കൈമാറി. 1989-ൽ ജനിച്ച ഒരു കുവൈറ്റ് പൗരനാണ് ഇത് സംബന്ധിച്ച വിവരം പൊലീസിന്റെ ഓപ്പറേഷൻ റൂമിൽ അറിയിച്ചത്. ഫോറൻസിക് വിദഗ്ധരും മെഡിക്കൽ എക്സാമിനർമാരും ഡെറ്റക്ടീവുകളും സ്ഥലത്തെത്തി തുടർനടപടികൾ സ്വീകരിച്ചു. രണ്ട് മരണങ്ങൾക്ക് പിന്നിലെയും യഥാർത്ഥ കാരണം കണ്ടെത്താൻ സമഗ്രമായ അന്വേഷണം പുരോഗമിക്കുകയാണ്.
