കുവൈത്ത് സിറ്റി: ഫാർമസി തൊഴിൽ മര്യാദകളും മരുന്ന് കൈകാര്യം ചെയ്യുന്നതിലെ ചട്ടങ്ങളും ലംഘിച്ചതായി കണ്ടെത്തിയതിനെത്തുടർന്ന് നാല് സ്വകാര്യ ഫാർമസികളുടെ ലൈസൻസ് ആരോഗ്യ മന്ത്രി ഡോ. അഹമ്മദ് അൽ അവാദി റദ്ദാക്കി. പൊതുജനാരോഗ്യം സംരക്ഷിക്കുന്നതിനും ആരോഗ്യമേഖലയിൽ അച്ചടക്കം ഉറപ്പാക്കുന്നതിനുമുള്ള മന്ത്രാലയത്തിന്റെ കർശന നീക്കമാണിതെന്ന് അധികൃതർ വ്യക്തമാക്കി. 2025-ലെ 237-ാം നമ്പർ മിനിസ്റ്റീരിയൽ റെസല്യൂഷൻ അടിസ്ഥാനമാക്കിയാണ് ലൈസൻസുകൾ റദ്ദാക്കിയത്. സ്വകാര്യ ഫാർമസികൾക്കുള്ള ലൈസൻസ് നടപടികളും മരുന്നുകളുടെ വിതരണവും സംബന്ധിച്ച നിയന്ത്രണങ്ങൾ ഈ ഉത്തരവിൽ വ്യക്തമാക്കുന്നുണ്ട്.ആരോഗ്യരംഗത്തെ അംഗീകൃത ചട്ടക്കൂടുകൾ നടപ്പിലാക്കുന്നതിലൂടെ പ്രൊഫഷണൽ അച്ചടക്കം ശക്തിപ്പെടുത്താനാണ് മന്ത്രാലയം ലക്ഷ്യമിടുന്നത്. പൊതുജനാരോഗ്യം സംരക്ഷിക്കുന്നതിനുള്ള അടിസ്ഥാന തൂണായാണ് ഈ നീക്കത്തെ മന്ത്രാലയം കാണുന്നത്. സ്വകാര്യ ഫാർമസികളുടെ പ്രവർത്തനം നിരീക്ഷിക്കുന്നത് ഒരു നിരന്തര പ്രക്രിയയാണെന്ന് ആരോഗ്യ മന്ത്രാലയം വ്യക്തമാക്കി. ഗുണനിലവാരമുള്ള സേവനം പൗരന്മാർക്ക് ഉറപ്പാക്കുന്നതിനും ആരോഗ്യ സംവിധാനത്തിലുള്ള പൊതുജനവിശ്വാസം വർദ്ധിപ്പിക്കുന്നതിനും ഇത് അനിവാര്യമാണ്. രാജ്യത്തിന്റെ എല്ലാ ഭാഗങ്ങളിലും പരിശോധനകളും നിരീക്ഷണ കാമ്പെയ്നുകളും തുടരുകയാണ്. നിയമലംഘനങ്ങൾ തിരുത്തുന്നതിനൊപ്പം തന്നെ സുരക്ഷിതമായ മരുന്ന് വിതരണം ഉറപ്പാക്കാനുള്ള സ്ഥാപനപരമായ ശ്രമങ്ങളാണ് മന്ത്രാലയം നടത്തിവരുന്നത്.
