കുവൈറ്റ് സിറ്റി: ശീതകാല ക്യാമ്പിംഗിനായി മരുഭൂമിയിലേക്ക് എത്തുന്നവരുടെ സുരക്ഷ ഉറപ്പാക്കാൻ ലക്ഷ്യമിട്ട് കുവൈറ്റ് ജനറൽ ഫയർ ഫോഴ്സ് വിപുലമായ ബോധവൽക്കരണ ക്യാമ്പയിൻ സംഘടിപ്പിച്ചു. ബുർഗാൻ ബാങ്കുമായി സഹകരിച്ച് നടത്തിയ ഈ പരിപാടിക്ക് പബ്ലിക് റിലേഷൻസ് ആൻഡ് മീഡിയ ഡിപ്പാർട്ട്മെന്റ് ഡയറക്ടർ ബ്രിഗേഡിയർ ജനറൽ മുഹമ്മദ് അൽ ഗരീബ് നേരിട്ട് നേതൃത്വം നൽകി. ഷെയ്ഖ് ജാബർ അൽ-അഹമ്മദ് പാലത്തിലെ സെക്യൂരിറ്റി ചെക്ക്പോയിന്റിൽ പങ്കുചേർന്നുകൊണ്ടാണ് സേന ക്യാമ്പയിന് തുടക്കം കുറിച്ചത്. ക്യാമ്പിംഗിനായി പോകുന്ന യാത്രക്കാരെ അഗ്നിസുരക്ഷാ മാർഗ്ഗങ്ങളെക്കുറിച്ച് ബോധവൽക്കരിച്ചു.സുബിയ മരുഭൂമിയിലെ ക്യാമ്പുകളിൽ ഉദ്യോഗസ്ഥർ നേരിട്ടെത്തി പരിശോധനകൾ നടത്തി. കൂടാരങ്ങളിൽ പാലിക്കേണ്ട സുരക്ഷാ മുൻകരുതലുകൾ അവർ വിശദീകരിച്ചു നൽകി. മരുഭൂമിയിൽ ക്യാമ്പ് ചെയ്യുന്നവർക്കും സന്ദർശകർക്കുമായി ഫയർ എക്സ്റ്റിംഗുഷറുകൾ (തീപിടുത്തം തടയാനുള്ള ഉപകരണങ്ങൾ), മറ്റ് സുരക്ഷാ കിറ്റുകൾ, മാർഗ്ഗനിർദ്ദേശങ്ങൾ അടങ്ങിയ ലഘുലേഖകൾ എന്നിവ വിതരണം ചെയ്തു.ശീതകാലത്ത് ക്യാമ്പുകളിൽ പാചകത്തിനും മറ്റുമായി തീ ഉപയോഗിക്കുമ്പോൾ ഉണ്ടാകാൻ സാധ്യതയുള്ള അപകടങ്ങൾ ഒഴിവാക്കുകയാണ് ഈ നീക്കത്തിലൂടെ ലക്ഷ്യമിടുന്നത്. ക്യാമ്പുകളിൽ പുക കണ്ടെത്താനുള്ള ഉപകരണങ്ങൾ ഘടിപ്പിക്കണമെന്നും കൂടാരത്തിനുള്ളിൽ കൽക്കരി കത്തിക്കരുതെന്നും അധികൃതർ നിർദ്ദേശിച്ചു.
