കുവൈറ്റ് സിറ്റി: രാജ്യത്തെ വൈദ്യുതി, ജല വിതരണ സംവിധാനങ്ങളുടെ കാര്യക്ഷമതയും സുരക്ഷാ സജ്ജീകരണങ്ങളും നേരിട്ട് വിലയിരുത്തുന്നതിനായി കുവൈറ്റ് പ്രധാനമന്ത്രി ഷെയ്ഖ് അഹമ്മദ് അബ്ദുള്ള അൽ-അഹമ്മദ് അൽ-സബാഹ് വൈദ്യുതി, ജലം, പുനരുപയോഗ ഊർജ്ജ മന്ത്രാലയത്തിൽ സന്ദർശനം നടത്തി. വൈദ്യുതി-ജല വകുപ്പ് മന്ത്രി ഡോ. സുബൈഹ് അബ്ദുൽ അസീസ് അൽ-മുഖൈസീം, മന്ത്രാലയം അണ്ടർസെക്രട്ടറി ഡോ. ആദിൽ മുഹമ്മദ് അൽ-സമീൽ എന്നിവരും പ്രധാനമന്ത്രിക്കൊപ്പമുണ്ടായിരുന്നു.
അടിയന്തര സാഹചര്യങ്ങൾ നേരിടാൻ മന്ത്രാലയം സജ്ജമാക്കിയ ഷെൽട്ടർ സെന്ററിന്റെ പ്രവർത്തനങ്ങൾ അദ്ദേഹം സൂക്ഷ്മമായി നിരീക്ഷിച്ചു.അസാധാരണമായ സാഹചര്യങ്ങളുണ്ടായാൽ സ്വീകരിക്കേണ്ട മുൻകരുതൽ നടപടികൾ, സുരക്ഷാ സംവിധാനങ്ങൾ, ലോജിസ്റ്റിക് സേവനങ്ങൾ എന്നിവയെക്കുറിച്ച് മന്ത്രാലയത്തിലെ ഉന്നത ഉദ്യോഗസ്ഥർ പ്രധാനമന്ത്രിക്ക് വിശദീകരിച്ചു നൽകി. നിലവിലെ പ്രതിസന്ധി ഘട്ടങ്ങളിൽ പൗരന്മാർക്കും താമസക്കാർക്കും വൈദ്യുതി, ജല സേവനങ്ങൾ തടസ്സമില്ലാതെ ലഭ്യമാക്കുന്നുണ്ടെന്ന് ഉറപ്പാക്കാൻ പ്രധാനമന്ത്രി നിർദ്ദേശിച്ചു. അടിയന്തര ഘട്ടങ്ങളിൽ പ്രവർത്തനക്ഷമമാകേണ്ട സുരക്ഷാ പ്രോട്ടോക്കോളുകളുടെ കാര്യക്ഷമതയും ലഭ്യമായ വിഭവങ്ങളുടെ വിന്യാസവും അദ്ദേഹം വിലയിരുത്തി.
സന്ദർശനത്തിന്റെ ഭാഗമായി നടന്ന ഉന്നതതല യോഗത്തിൽ രാജ്യത്തെ ഊർജ്ജ-ജല സംവിധാനങ്ങളുടെ സ്ഥിരത ഉറപ്പാക്കാനുള്ള നടപടികൾ പ്രധാനമന്ത്രി അവലോകനം ചെയ്തു. ദേശീയ ഗ്രിഡിന്റെ സുരക്ഷ വർദ്ധിപ്പിക്കുന്നതിനും വിവിധ സർക്കാർ ഏജൻസികൾ തമ്മിലുള്ള ഏകോപനം ശക്തമാക്കുന്നതിനുമുള്ള മാർഗ്ഗങ്ങൾ യോഗത്തിൽ ചർച്ചയായി. എല്ലാ ഉപഭോക്താക്കളുടെയും ആവശ്യങ്ങൾ നിറവേറ്റുന്നതിനൊപ്പം തന്നെ അടിയന്തര സാഹചര്യങ്ങളെ നേരിടാൻ മന്ത്രാലയം സദാ സജ്ജമായിരിക്കണമെന്ന് അദ്ദേഹം ഉദ്യോഗസ്ഥർക്ക് കർശന നിർദ്ദേശം നൽകി.
