കുവൈറ്റ് സിറ്റി: കുവൈറ്റിലെ ജഹ്റ ട്രാഫിക് ഡിപ്പാർട്ട്മെന്റിലെ ഉദ്യോഗസ്ഥർ നടത്തിയ കർശന പരിശോധനയിൽ, വിവിധ നിയമലംഘനങ്ങൾക്ക് കോടതി അറസ്റ്റ് വാറന്റ് പുറപ്പെടുവിച്ചിരുന്ന വിവിധ രാജ്യക്കാരായ എട്ട് പ്രവാസികളെ പിടികൂടി. ഇവർക്കെതിരെ വാറന്റ് പുറപ്പെടുവിച്ച് കൃത്യം 24 മണിക്കൂറിനുള്ളിൽ തന്നെ ഇവരെ അറസ്റ്റ് ചെയ്യാൻ കഴിഞ്ഞതായി സുരക്ഷാ വൃത്തങ്ങൾ വ്യക്തമാക്കി. പിടിയിലായ എല്ലാവരെയും ആവശ്യമായ നിയമനടപടികൾ പൂർത്തിയാക്കുന്നതിനായി ബന്ധപ്പെട്ട വകുപ്പുകൾക്ക് കൈമാറി.
അതേസമയം, ട്രാഫിക് ഇൻവെസ്റ്റിഗേഷൻ ഡിപ്പാർട്ട്മെന്റിലെ ഉദ്യോഗസ്ഥർ നടത്തിയ മറ്റൊരു പരിശോധനയിൽ, തന്റെ വാഹനത്തിൽ നമ്പർ പ്ലേറ്റ് ഘടിപ്പിക്കാതെ അശ്രദ്ധമായി വണ്ടിയോടിച്ച കുവൈറ്റ് സ്വദേശിയെ അറസ്റ്റ് ചെയ്തു. ഇയാളുടെ വാഹനം പോലീസ് പിടിച്ചെടുത്ത് കസ്റ്റഡിയിലെടുക്കുകയും, ഇയാളെ ട്രാഫിക് ഡിറ്റൻഷൻ സെന്ററിലേക്ക് മാറ്റുകയും ചെയ്തു.
ദൈനംദിന പട്രോളിംഗിനിടെയാണ് ട്രാഫിക് നിയമങ്ങൾ കാറ്റിൽപ്പറത്തി നമ്പർ പ്ലേറ്റില്ലാതെ സഞ്ചരിച്ച ഈ സ്വദേശിയുടെ വാഹനം പോലീസിന്റെ ശ്രദ്ധയിൽപ്പെട്ടത്. ഉടനടി വാഹനം തടഞ്ഞുനിർത്തി ഇയാളെ കസ്റ്റഡിയിലെടുക്കുകയായിരുന്നു. വാഹനങ്ങളിൽ കൃത്യമായി നമ്പർ പ്ലേറ്റുകൾ ഘടിപ്പിക്കേണ്ടത് നിയമപരമായി നിർബന്ധമാണെന്നും, നമ്പർ പ്ലേറ്റില്ലാതെ വാഹനങ്ങൾ നിരത്തിലിറക്കുന്നത് കർശനമായി നിരോധിച്ചിട്ടുണ്ടെന്നും സുരക്ഷാ ഉദ്യോഗസ്ഥർ ഈ സംഭവത്തോടെ ഒരിക്കൽക്കൂടി ഓർമ്മിപ്പിച്ചു. തൊഴിൽ-ട്രാഫിക് നിയമലംഘനങ്ങൾ കണ്ടെത്താൻ രാജ്യത്തുടനീളം വരും ദിവസങ്ങളിലും കർശന പരിശോധന തുടരുമെന്ന് അധികൃതർ വ്യക്തമാക്കി.
