കുവൈത്ത് സിറ്റി : കുവൈത്തിൽ പണം, വാഹനത്തിന്റെ നമ്പർ പ്ലേറ്റുകൾ, ഐഫോൺ എന്നിവ മോഷണം പോയതുമായി ബന്ധപ്പെട്ട് മൂന്ന് വ്യത്യസ്ത കേസുകളിൽ സുരക്ഷാ ഉദ്യോഗസ്ഥർ അന്വേഷണം ആരംഭിച്ചു.ആദ്യ സംഭവത്തിൽ, 240 കുവൈത്ത് ദിനാർ മോഷണം പോയതായി ഒരു കുവൈത്തി പൗരൻ പൊലീസിൽ പരാതി നൽകി. തന്റെ ഫാമിൽ ജോലി ചെയ്യുന്ന തൊഴിലാളിയെയാണ് സംശയിക്കുന്നതെന്ന് പരാതിക്കാരൻ അറിയിച്ചു. കേസ് രജിസ്റ്റർ ചെയ്ത് കൂടുതൽ അന്വേഷണത്തിന് കൈമാറി.
രണ്ടാമത്തെ സംഭവത്തിൽ, സബാഹ് അൽ-അഹമ്മദ് റെസിഡൻഷ്യൽ സിറ്റിയിലെ ഒരു കോ-ഓപ്പറേറ്റീവ് സൊസൈറ്റിക്ക് മുന്നിൽ പാർക്ക് ചെയ്തിരുന്ന Toyota Land Cruiser വാഹനത്തിന്റെ നമ്പർ പ്ലേറ്റുകൾ മോഷണം പോയതായി മറ്റൊരു കുവൈത്തി പൗരൻ പരാതി നൽകി. സംഭവത്തിൽ ആരെയും സംശയിക്കുന്നില്ലെന്ന് പരാതിക്കാരൻ വ്യക്തമാക്കി. പ്രതികളെ കണ്ടെത്തുന്നതിനായി അന്വേഷണം തുടരുകയാണ്.
മൂന്നാമത്തെ കേസിൽ, അലി സബാഹ് അൽ-സലേം പ്രദേശത്ത് വെച്ച് മകന്റെ iPhone 16 Pro Max മോഷണം പോയതായി ഒരു പിതാവ് പൊലീസിൽ പരാതി നൽകി. മകനെ പ്രതിനിധീകരിക്കാൻ അനുവദിക്കുന്ന പവർ ഓഫ് അറ്റോർണിയുടെ അടിസ്ഥാനത്തിലാണ് പിതാവ് പരാതി നൽകിയത്.മൂന്ന് മോഷണക്കേസുകളിലും പ്രതികളെ കണ്ടെത്തുന്നതിനായി കുവൈത്ത് സുരക്ഷാ അധികൃതർ അന്വേഷണം തുടരുകയാണ്.
