കുവൈറ്റ് സിറ്റി: വരാനിരിക്കുന്ന മഴക്കാലത്തിന് മുന്നോടിയായി കുവൈറ്റ് ജനറൽ ഫയർ ഫോഴ്സിന്റെ സജ്ജീകരണങ്ങളും പ്രതിരോധ പ്രവർത്തനങ്ങളും വിലയിരുത്താൻ ഫയർ ഫോഴ്സ് മേധാവി മേജർ ജനറൽ തലാൽ അൽ-റൂമി സപ്പോർട്ട് സെന്റർ നേരിട്ടെത്തി പരിശോധിച്ചു. മോശം കാലാവസ്ഥയും പ്രകൃതിദുരന്തങ്ങളും ഉണ്ടായാൽ നേരിടാൻ സജ്ജമാക്കിയിരിക്കുന്ന വാഹനാവ്യൂഹങ്ങളുടെയും അത്യാധുനിക ഉപകരണങ്ങളുടെയും പ്രവർത്തനക്ഷമത അദ്ദേഹം നേരിട്ട് സന്ദർശിച്ച് ഉറപ്പുവരുത്തി.
അടിയന്തര സാഹചര്യങ്ങളിൽ അതിവേഗ രക്ഷാപ്രവർത്തനത്തിനായി ഉപയോഗിക്കുന്ന ഹൈഡ്രോളിക് വാട്ടർ സക്ഷൻ പമ്പുകൾ, വിവിധ ശേഷിയുള്ള ഇലക്ട്രിക്-മെക്കാനിക്കൽ പമ്പുകൾ, ഫയർ ടെൻഡറുകൾക്ക് എത്താൻ സാധിക്കാത്ത ഇടങ്ങളിൽ ഉപയോഗിക്കുന്ന പോർട്ടബിൾ ബോട്ടുകൾ എന്നിവയുടെ സജ്ജീകരണങ്ങൾ സന്ദർശന വേളയിൽ അദ്ദേഹം വിലയിരുത്തി. വെള്ളപ്പൊക്കത്തിൽ വീടുകളിലോ വാഹനങ്ങളിലോ കുടുങ്ങിപ്പോകുന്നവരെ സുരക്ഷിതമായി ഒഴിപ്പിക്കുന്നതിനുള്ള സംവിധാനങ്ങളും അദ്ദേഹം പരിശോധിച്ചു.
അടിയന്തര സന്ദേശങ്ങൾ ലഭിച്ചാൽ ഉടനടി പ്രതികരിക്കാൻ ഫീൽഡ് ടീമുകളെ ഏകോപിപ്പിക്കുന്നതിനുള്ള കർമ്മപദ്ധതികളും സാങ്കേതിക വിന്യാസവും സന്ദർശനത്തിൽ ചർച്ചയായി. ജനങ്ങളുടെ ജീവനും സ്വത്തിനും സംരക്ഷണം ഉറപ്പാക്കാൻ ഏത് നിമിഷവും സജ്ജമായിരിക്കാനും മിന്നൽ രക്ഷാപ്രവർത്തനങ്ങൾ ഉറപ്പാക്കാനും അദ്ദേഹം ഉദ്യോഗസ്ഥർക്ക് കർശന നിർദ്ദേശം നൽകി.
