കുവൈറ്റ് സിറ്റി: കുവൈറ്റിൽ സർക്കാർ ഭൂമിയിൽ നിയമവിരുദ്ധമായി നിർമ്മാണങ്ങൾ നടത്തുന്നതിനെതിരെ മുൻസിപ്പാലിറ്റി ആരംഭിച്ച വ്യാപക പരിശോധനകളിൽ വൻ മുന്നേറ്റം. പ്രൈവറ്റ് ഹൗസിംഗ് പരിധിയിൽ വരുന്ന നാല് പ്രധാന മേഖലകൾ പൂർണ്ണമായും കൈയേറ്റമുക്തമാക്കിയതായി കുവൈറ്റ് മുൻസിപ്പാലിറ്റി ഡയറക്ടറുടെ ഓഫീസ് സെൻട്രൽ ടീം അംഗം മുഹമ്മദ് അൽ-ജലാവി അറിയിച്ചു. ബന്ധപ്പെട്ട മുൻസിപ്പാലിറ്റി വകുപ്പിന്റെ സ്ഥിരീകരണത്തോടെ ഈ പ്രദേശങ്ങൾ പൂർണ്ണ സുരക്ഷിതത്വത്തിൽ കൈമാറിയിട്ടുണ്ട്.
“കൈയേറ്റങ്ങളില്ലാത്ത മനോഹര കുവൈറ്റ്” എന്ന പ്രമേയത്തിൽ മുൻസിപ്പാലിറ്റി നടപ്പിലാക്കി വരുന്ന പ്രചാരണത്തിന്റെ ഭാഗമായി അൽ-ഫർവാനിയ ഗവർണറേറ്റിലെ സബാഹ് അൽ-നാസർ മേഖലയിൽ തിങ്കളാഴ്ച പ്രത്യേക ഫീൽഡ് പരിശോധനകൾ നടത്തി. എല്ലാ ഗവർണറേറ്റുകളിലും രാജ്യം നേരിടുന്ന ഭൂമി കൈയേറ്റങ്ങൾ കണ്ടെത്തി പൂർണ്ണമായും ഒഴിപ്പിക്കാൻ സൂപ്പർവൈസറി ടീമുകൾക്ക് കർശന നിർദ്ദേശം നൽകിയിട്ടുണ്ടെന്ന് അൽ-ജലാവി വ്യക്തമാക്കി.
പഴയതും പുതിയതുമായ എല്ലാവിധ അനധികൃത നിർമ്മാണങ്ങളും നീക്കം ചെയ്യുന്നതുവരെ പരിശോധനകൾ തുടരുമെന്ന് മുൻസിപ്പാലിറ്റി വ്യക്തമാക്കി. ഇത് താത്കാലികമായ ഒരു പ്രചാരണമല്ലെന്നും നിയമം നടപ്പിലാക്കുന്നതിലും പ്രദേശവാസികളുടെ പൊതുസുരക്ഷ ഉറപ്പാക്കുന്നതിലും മുൻസിപ്പാലിറ്റി വിട്ടുവീഴ്ച ചെയ്യില്ലെന്നും അദ്ദേഹം കൂട്ടിച്ചേർത്തു. രാജ്യത്തിന്റെ പൊതുസ്വത്ത് സംരക്ഷിക്കേണ്ടത് എല്ലാവരുടെയും കൂട്ടായ ഉത്തരവാദിത്തമാണെന്നും അധികൃതർ ഓർമ്മിപ്പിച്ചു.
