കുവൈത്ത്സിറ്റി: സോഷ്യൽ മീഡിയയുമായി ബന്ധപ്പെട്ട വിവിധ സ്റ്റേറ്റ് സെക്യൂരിറ്റി കേസുകളിൽ കുവൈത്ത് സ്റ്റേറ്റ് സെക്യൂരിറ്റി ആൻഡ് ടെററിസം ക്രൈംസ് കോടതി നിരവധി വിധികൾ പുറപ്പെടുവിച്ചു.സോഷ്യൽ മീഡിയയിലൂടെ അമീറിനെ അപമാനിച്ചെന്ന കേസിൽ തലാൽ അൽ ദബ്ബൂസിന് അഞ്ച് വർഷം കഠിന തടവ് വിധിച്ചു. ശിക്ഷ ഉടൻ നടപ്പാക്കാനും കോടതി ഉത്തരവിട്ടു.
സോഷ്യൽ മീഡിയയിലൂടെ വ്യാജവാർത്ത പ്രചരിപ്പിച്ച കേസിൽ ലുൽവ അൽ ഹുസൈനാനും മൻസൂർ അൽ മുഹാരിബിനും അഞ്ച് വർഷം വീതം കഠിന തടവ് വിധിച്ചു. ഓൺലൈനിൽ പ്രസിദ്ധീകരിച്ച വീഡിയോ നശിപ്പിക്കാനും കോടതി ഉത്തരവിട്ടു.മറ്റൊരു കേസിൽ വിഭാഗീയ സംഘർഷത്തിന് പ്രേരിപ്പിച്ചെന്ന കുറ്റത്തിന് ഒരു കുവൈത്ത് പൗരന് മൂന്ന് വർഷം കഠിന തടവ് വിധിച്ചു.
അമീറിനെ അപമാനിച്ചതുമായി ബന്ധപ്പെട്ട മറ്റ് രണ്ട് കേസുകളിൽ ഒരാൾക്ക് രണ്ട് വർഷവും മറ്റൊരാൾക്ക് അഞ്ച് വർഷവും കഠിന തടവ് വിധിച്ചിട്ടുണ്ട്.അതേസമയം, മഹ്മൂദ് അൽ ഫൈലക്കാവിക്കെതിരായ കേസ് പരിഗണിക്കാൻ തങ്ങൾക്ക് അധികാരപരിധിയില്ലെന്ന് കോടതി വ്യക്തമാക്കി. മറ്റൊരു കേസിൽ അഭിഭാഷകനെ ഒരു കുറ്റത്തിൽ വെറുതെവിട്ട കോടതി, മറ്റൊരു കുറ്റത്തിൽ ശിക്ഷ നൽകാതെ രണ്ട് വർഷം നല്ലനടപ്പ് പാലിക്കണമെന്ന വ്യവസ്ഥയും 5,000 ദിനാർ ജാമ്യവും ഏർപ്പെടുത്തി.
