കുവൈറ്റ് സിറ്റി: പൗരന്മാർക്കും താമസക്കാർക്കും ഓഫീസുകളിൽ നേരിട്ടെത്താതെ തന്നെ വിവിധ ട്രാഫിക് സേവനങ്ങൾ പൂർത്തിയാക്കുന്നതിനായി പുതിയ ഡിജിറ്റൽ സംവിധാനവുമായി കുവൈറ്റ് ആഭ്യന്തര മന്ത്രാലയം. ‘മൈ ഐഡന്റിറ്റി’ ആപ്പ് വഴി ഇലക്ട്രോണിക് ആധികാരികത ഉറപ്പുവരുത്തി, തങ്ങൾക്ക് പകരം മറ്റൊരാളെ പ്രതിനിധിയായി ചുമതലപ്പെടുത്തി 18 വ്യത്യസ്ത ട്രാഫിക് നടപടിക്രമങ്ങൾ പൂർത്തിയാക്കാൻ പുതിയ സേവനത്തിലൂടെ സാധിക്കും. നേരിൽ ഹാജരാകാൻ കഴിയാത്ത ക്ലയന്റുകൾക്ക് നടപടിക്രമങ്ങൾ എളുപ്പമാക്കുക, സമയം ലാഭിക്കുക, സർക്കാർ സേവനങ്ങളുടെ കാര്യക്ഷമത വർദ്ധിപ്പിക്കുക എന്നിവ ലക്ഷ്യമിട്ടാണ് ഈ പുതിയ പദ്ധതിക്ക് തുടക്കമിട്ടിരിക്കുന്നത്.
പുതിയ സേവനത്തിന് കീഴിൽ വരുന്ന പ്രധാന ട്രാഫിക് ഇടപാടുകൾ :
വാഹന ഉടമസ്ഥാവകാശം കൈമാറുന്നതിനുള്ള നടപടികൾ
വാഹനം കയറ്റുമതി ചെയ്യുന്നതിനുള്ള നടപടിക്രമങ്ങൾ
നഷ്ടപ്പെട്ടതോ കേടായതോ ആയ നമ്പർ പ്ലേറ്റുകൾക്ക് പകരമായി പുതിയവ അനുവദിക്കൽ
വാഹന രജിസ്ട്രേഷൻ പുതുക്കൽ
വാഹന നമ്പർ പ്ലേറ്റുകൾ കൈപ്പറ്റൽ
വാഹന ലൈസൻസുകൾ റദ്ദാക്കൽ
പ്രായപൂർത്തിയാകാത്തവർക്ക് വാഹന ഉടമസ്ഥാവകാശം മാറ്റുന്നതിനുള്ള മാതാപിതാക്കളുടെ സമ്മതം
പുതിയ വാഹനങ്ങളുടെ രജിസ്ട്രേഷൻ
വാഹനം പൊളിച്ചുമാറ്റുന്നതുമായി ബന്ധപ്പെട്ട നടപടികൾ
പുതിയ വാഹനങ്ങളുടെ പരിശോധന
ഡ്രൈവിംഗ് ലൈസൻസുമായി ബന്ധപ്പെട്ട ഇടപാടുകൾ
ഡ്രൈവിംഗ് പെർമിറ്റ് ഇടപാടുകൾ
ട്രാഫിക് നിയമലംഘനങ്ങൾ കൈമാറുന്നത്
പിഴ പോയിന്റ് സിസ്റ്റത്തിന് കീഴിൽ ഡ്രൈവിംഗ് ലൈസൻസുകൾ കണ്ടുകെട്ടൽ
ട്രാഫിക് സിഗ്നേച്ചർ അംഗീകാരങ്ങൾ പുതുക്കലും നൽകലും
പിടിച്ചെടുത്ത വാഹനങ്ങൾ വിട്ടുനൽകൽ
ട്രാഫിക് നിയമലംഘനങ്ങൾ കോടതിയിലേക്ക് റഫർ ചെയ്യൽ
ഡിജിറ്റൽ സേവനങ്ങൾ കൂടുതൽ വ്യാപിപ്പിക്കുന്നതിന്റെയും സർക്കാർ നടപടിക്രമങ്ങൾ ലളിതമാക്കുന്നതിന്റെയും ഭാഗമായാണ് ആഭ്യന്തര മന്ത്രാലയം ഈ പുതിയ സംരംഭത്തിന് തുടക്കമിട്ടിരിക്കുന്നത്.
