കുവൈത്ത് സിറ്റി: പൊതുനിരത്തുകളിൽ അമിതവേഗത്തിലും അപകടകരമായ രീതിയിലും വാഹനമോടിക്കുകയും അനുമതിയില്ലാതെ കാർ റേസിങ് നടത്തുകയും ചെയ്ത അഞ്ചു ഡ്രൈവർമാരെ കുവൈത്ത് ട്രാഫിക് വിഭാഗം അറസ്റ്റ് ചെയ്തു. ഇവരുടെ വാഹനങ്ങൾ പിടിച്ചെടുത്ത് പൊളിച്ചുനീക്കുന്നതിനായി കൈമാറിയതായി ആഭ്യന്തര മന്ത്രാലയം അറിയിച്ചു.നിയമലംഘനങ്ങൾ വ്യക്തമാക്കുന്ന വീഡിയോ ദൃശ്യങ്ങൾ ലഭിച്ചതിനെ തുടർന്നാണ് ജനറൽ ഡയറക്ടറേറ്റ് ഓഫ് ട്രാഫിക്കിന് കീഴിലുള്ള സെക്യൂരിറ്റി കൺട്രോൾ വിഭാഗം അന്വേഷണം ആരംഭിച്ചത്.
വീഡിയോ ദൃശ്യങ്ങൾ വിശദമായി പരിശോധിച്ച ഉദ്യോഗസ്ഥർ വാഹനങ്ങളെയും ഡ്രൈവർമാരെയും തിരിച്ചറിയുകയും തുടർന്ന് നടത്തിയ അന്വേഷണത്തിലൂടെ അഞ്ചുപേരെയും പിടികൂടുകയുമായിരുന്നു.അമിതവേഗത്തിൽ വാഹനമോടിക്കൽ, മറ്റുള്ളവരുടെ ജീവന് ഭീഷണിയാകുന്ന രീതിയിലുള്ള ഡ്രൈവിങ്, ആവശ്യമായ അനുമതിയില്ലാതെ പൊതുനിരത്തുകളിൽ വാഹനമത്സരം നടത്തൽ തുടങ്ങിയ നിയമലംഘനങ്ങളാണ് ഇവർക്കെതിരെ കണ്ടെത്തിയത്.
അഞ്ചുപേർക്കുമെതിരെ ട്രാഫിക് നിയമലംഘനങ്ങൾ രേഖപ്പെടുത്തിയ ശേഷം സെൻട്രൽ ജയിലിലേക്ക് മാറ്റി. ഇവരുടെ വാഹനങ്ങൾ പിടിച്ചെടുക്കുകയും ട്രാഫിക് നിയമത്തിലെ ആർട്ടിക്കിൾ 33 ബിസ് പ്രകാരം പൊളിച്ചുനീക്കുന്നതിനായി കൈമാറുകയും ചെയ്തു.പൊതുനിരത്തുകളിൽ അപകടകരമായ രീതിയിൽ വാഹനമോടിക്കുന്നവർക്കെതിരെ വിട്ടുവീഴ്ചയില്ലാത്ത നടപടികൾ തുടരുമെന്ന് ആഭ്യന്തര മന്ത്രാലയം മുന്നറിയിപ്പ് നൽകി.
അമിതവേഗം, അശ്രദ്ധമായ ഡ്രൈവിങ്, അനധികൃത വാഹനമത്സരങ്ങൾ എന്നിവ ഡ്രൈവർമാരുടെയും മറ്റ് റോഡ് ഉപയോക്താക്കളുടെയും ജീവന് ഗുരുതരമായ ഭീഷണിയാണെന്നും ഇത്തരം നിയമലംഘനങ്ങൾ ഒരുതരത്തിലും അനുവദിക്കില്ലെന്നും മന്ത്രാലയം വ്യക്തമാക്കി.റോഡ് സുരക്ഷ ഉറപ്പാക്കുന്നതിനും പൊതുജനങ്ങളുടെ ജീവനും സ്വത്തിനും സംരക്ഷണം നൽകുന്നതിനുമായി പരിശോധനകളും നിയമനടപടികളും ശക്തമായി തുടരുമെന്നും അധികൃതർ അറിയിച്ചു.
