കുവൈത്ത് സിറ്റി: സൗഹൃദ രാജ്യമായ ഇറാനിലെ നിലവിലെ മാറിക്കൊണ്ടിരിക്കുന്ന സാഹചര്യങ്ങൾ മുൻനിർത്തി അവിടെയുള്ള തങ്ങളുടെ പൗരന്മാർക്ക് കുവൈത്ത് വിദേശകാര്യ മന്ത്രാലയം കർശന ജാഗ്രതാ നിർദ്ദേശം നൽകി. പൗരന്മാരുടെ സുരക്ഷ ഉറപ്പാക്കുന്നതിനായി അടിയന്തര സാഹചര്യങ്ങളിൽ ബന്ധപ്പെടാനുള്ള ഹെൽപ്പ് ലൈൻ നമ്പറുകളും മന്ത്രാലയം പുറത്തുവിട്ടു. ഇറാനിൽ താമസിക്കുന്ന എല്ലാ കുവൈത്തി പൗരന്മാരും അതീവ ജാഗ്രത പാലിക്കണമെന്നും വലിയ ജനക്കൂട്ടങ്ങളോ പ്രതിഷേധ പ്രകടനങ്ങളോ നടക്കുന്ന ഇടങ്ങളിൽ നിന്ന് പൂർണ്ണമായും വിട്ടുനിൽക്കണമെന്നും മന്ത്രാലയം ആവശ്യപ്പെട്ടു.ഇറാനിലെ പ്രാദേശിക അധികൃതർ നൽകുന്ന നിർദ്ദേശങ്ങളും സുരക്ഷാ മാർഗ്ഗരേഖകളും കൃത്യമായി പാലിക്കാൻ പൗരന്മാർക്ക് നിർദ്ദേശം നൽകിയിട്ടുണ്ട്. എന്തെങ്കിലും തരത്തിലുള്ള അടിയന്തര സാഹചര്യങ്ങൾ ഉണ്ടായാൽ ടെഹ്റാനിലെ കുവൈറ്റ് എംബസിയുമായോ വിദേശകാര്യ മന്ത്രാലയവുമായോ ഉടനടി ബന്ധപ്പെടണം.
