കുവൈത്ത് സിറ്റി: യൂറോപ്പ്, ജോർദാൻ, തുർക്കി എന്നിവിടങ്ങളിൽ നിന്ന് കുവൈത്തിലേക്ക് മടങ്ങാൻ ആഗ്രഹിക്കുന്ന യാത്രക്കാരെ സഹായിക്കുന്നതിനായി കുവൈത്ത് എയർവേയ്സ് ദമ്മാം വിമാനത്താവളത്തിലേക്ക് പ്രത്യേക വിമാനങ്ങൾ പ്രഖ്യാപിച്ചു. പാരീസിൽ നിന്ന് ദമ്മാമിലേക്കുള്ള KU168D നമ്പർ വിമാനം വെള്ളിയാഴ്ച രാവിലെ 11:00 മണിക്ക് (പാരീസ് സമയം) പുറപ്പെടും. ഇത് വൈകുന്നേരം 7:20 ന് ദമ്മാമിൽ എത്തുമെന്നാണ് പ്രതീക്ഷിക്കുന്നത്. യൂറോപ്പിൽ ഉള്ളവർക്ക് കുവൈത്തിലേക്ക് മടങ്ങാൻ ഇതാണ് അവസാനമായി നിശ്ചയിച്ചിരിക്കുന്ന പ്രത്യേക വിമാനം എന്ന് കമ്പനി അറിയിച്ചു.
അതേസമയം ജോർദാനിലെ അമ്മാനിൽ നിന്ന് KU562D നമ്പർ വിമാനം വ്യാഴാഴ്ച അർദ്ധരാത്രി 12:00 മണിക്ക് പുറപ്പെടുകയും ഉച്ചയ്ക്ക് 2:20 ന് ദമ്മാമിൽ എത്തുകയും ചെയ്യും. കൂടാതെ തുർക്കിയിലെ ഇസ്താംബൂളിലെ സാബിഹ ഗോക്ചൻ അന്താരാഷ്ട്ര വിമാനത്താവളത്തിൽ നിന്ന് KU158D നമ്പർ വിമാനം ചൊവ്വാഴ്ച രാവിലെ 11:00 മണിക്ക് പുറപ്പെടുകയും വൈകുന്നേരം 3:00 മണിക്ക് ദമ്മാമിൽ എത്തുകയും ചെയ്യും.ഈ വിമാനങ്ങൾ ഉപയോഗിച്ച് ദമ്മാമിൽ എത്തുന്ന യാത്രക്കാർ പിന്നീട് റോഡ് മാർഗ്ഗം കുവൈത്തിലേക്ക് പ്രവേശിക്കേണ്ടതായിരിക്കും.
കുവൈത്ത് എയർവേയ്സ് വ്യക്തമാക്കിയതുപോലെ, കുവൈത്തിലേക്ക് മടങ്ങുന്ന പ്രവാസികൾക്ക് സൗദി അറേബ്യ വഴി യാത്ര ചെയ്യുന്നതിനായി ട്രാൻസിറ്റ് വിസ നിർബന്ധമാണ്.ബുക്കിംഗുകൾക്കായി യാത്രക്കാർ കസ്റ്റമർ സർവീസ് സെന്റർ 171-ലോ അല്ലെങ്കിൽ WhatsApp +965 1802050-ലോ ബന്ധപ്പെടാമെന്ന് കമ്പനി അറിയിച്ചു.
