കുവൈത്ത് സിറ്റി: രാജ്യത്തും മേഖലയിലും നിലനിൽക്കുന്ന നിലവിലെ സാഹചര്യങ്ങളെ പരിഗണിച്ച് ഈദുൽ ഫിത്വർ കാലയളവിൽ സ്റ്റേജ് പരിപാടികൾ, പാർട്ടികൾ, വിവാഹങ്ങൾ തുടങ്ങിയ വലിയ പൊതുചടങ്ങുകൾ നടത്തുന്നത് താൽക്കാലികമായി നിരോധിച്ചതായി ആഭ്യന്തര മന്ത്രാലയം അറിയിച്ചു.
സമൂഹത്തിന്റെ സുരക്ഷയും പൗരന്മാരുടെയും പ്രവാസികളുടെയും സുരക്ഷയും ഉറപ്പാക്കുന്നതിനായി വലിയ ജനക്കൂട്ടങ്ങൾ ഒഴിവാക്കുകയും സുരക്ഷാ നടപടികൾ ശക്തിപ്പെടുത്തുകയും ചെയ്യുന്നതിനുള്ള മുൻകരുതൽ നടപടിയായാണ് ഈ തീരുമാനം എടുത്തതെന്ന് മന്ത്രാലയം വ്യക്തമാക്കി. ഇതുസംബന്ധിച്ച നിർദേശങ്ങൾ എല്ലാവരും കർശനമായി പാലിക്കണമെന്നും ബന്ധപ്പെട്ട അധികാരികളുമായി സഹകരിക്കണമെന്നും മന്ത്രാലയം അഭ്യർത്ഥിച്ചു.
ഈ നിർദേശങ്ങൾ ലംഘിക്കുന്നവർക്ക് നിയമനടപടി സ്വീകരിക്കുമെന്നും ആഭ്യന്തര മന്ത്രാലയം മുന്നറിയിപ്പ് നൽകി. രാജ്യത്തിന്റെ സുരക്ഷയും സ്ഥിരതയും സംരക്ഷിക്കുന്നതിനായി എല്ലാവരും ദേശീയ ഉത്തരവാദിത്വം പാലിച്ച് പൊതുതാൽപര്യത്തിന് മുൻഗണന നൽകണമെന്നും മന്ത്രാലയം ആവശ്യപ്പെട്ടു.
