കുവൈത്ത് സിറ്റി: ശനിയാഴ്ച പുലർച്ചെ 7 ശത്രു ഡ്രോണുകൾ കുവൈത്തിന് നേരെ വന്നതാറൂം ഇതിൽ 3 ഡ്രോണുകൾ വിജയകരമായി വെടിവച്ച് തകർത്തതായി കുവൈറ്റ് മിനിസ്ട്രി അറിയിച്ചു. ശേഷിച്ച ഡ്രോണുകൾ പരിമിതമായ ഭീഷണിയായിരുന്നു. അവയിൽ 2 ഡ്രോണുകൾ ഭീഷണി മേഖലയ്ക്ക് പുറത്തേക്ക് വീണതിനാൽ അപകടമൊന്നും ഉണ്ടായില്ല, മറ്റൊരു 2 ഡ്രോണുകൾ അഹമ്മദ് അൽ-ജാബർ എയർബേസിനെ ലക്ഷ്യമിട്ടിരുന്നതായി മന്ത്രാലയത്തിന്റെ ഔദ്യോഗിക വക്താവ് കേണൽ സൗദ് അബ്ദുലഅസീസ് അൽ-ഒതൈബി പറഞ്ഞു.
ഈ സംഭവത്തിൽ എയർബേസിന് സമീപമുള്ള പ്രദേശങ്ങളിൽ ചില വസ്തു നാശനഷ്ടങ്ങൾ ഉണ്ടായതായി മന്ത്രാലയം അറിയിച്ചു. സംഭവത്തിനിടെ കുവൈത്ത് സായുധസേനയിലെ 3 സൈനികർക്കു ചെറിയ പരിക്കേറ്റു, അവർക്ക് ആവശ്യമായ ചികിത്സ നൽകി, ആരോഗ്യനില സ്ഥിരതയിലാണെന്ന് അധികൃതർ അറിയിച്ചു. രാജ്യത്തിന്റെ സുരക്ഷയും സാർവഭൗമത്വവും സംരക്ഷിക്കാൻ കുവൈത്ത് സായുധസേന പൂർണ സജ്ജതയോടെ തുടരുന്നുവെന്ന് മന്ത്രാലയം വ്യക്തമാക്കി.
