കുവൈത്ത്: ഇവന്റ് ടെന്റുകളും താൽക്കാലിക വിവാഹ ഹാളുകളും സ്ഥാപിക്കാൻ പുതിയ താൽക്കാലിക ലൈസൻസുകൾ അനുവദിക്കുന്നത് അടുത്ത അറിയിപ്പുണ്ടാകുന്നതുവരെ നിർത്തിവെച്ചതായി. ഈ തീരുമാനം ഞായറാഴ്ച മുതൽ പ്രാബല്യത്തിൽ വന്നിട്ടുണ്ടെന്ന് കുവൈറ്റ് മുനിസിപ്പാലിറ്റി അറിയിച്ചു.
നിലവിലെ പ്രദേശിക സാഹചര്യങ്ങളെ പരിഗണിച്ച് പൗരന്മാരുടെയും താമസക്കാരുടെയും സുരക്ഷ ഉറപ്പാക്കുന്നതിനായി മിനിസ്ട്രി ഓഫ് ഇന്റീരിയർ പുറപ്പെടുവിച്ച സർക്കുലറിന്റെ അടിസ്ഥാനത്തിലാണ് ഈ തീരുമാനം എടുത്തത്.
പുതിയതായി വിവാഹ ഹാളുകൾക്കായുള്ള ടെന്റുകൾ സ്ഥാപിക്കാൻ അപേക്ഷ നൽകിയവർ, കുവൈത്തിലെ വിവിധ ഗവർണറേറ്റുകളിലെ മുനിസിപ്പാലിറ്റി ശാഖകളിലെ പബ്ലിക് ക്ലീന്ലിനസ് വിഭാഗവും റോഡ് ഒക്ക്യുപേഷൻ വിഭാഗവും നടത്തുന്ന പരിശോധന ഉദ്യോഗസ്ഥരുമായി സഹകരിക്കണമെന്ന് മുനിസിപ്പാലിറ്റി അഭ്യർത്ഥിച്ചു.
താൽക്കാലിക ലൈസൻസുകൾ വീണ്ടും അനുവദിക്കുന്നതുവരെ ഈ നടപടിക്രമം തുടരുമെന്നും അധികൃതർ അറിയിച്ചു.
