കുവൈത്ത്സിറ്റി: ഐഎംഡി സ്മാർട്ട് സിറ്റീസ് ഇൻഡക്സ് 2026-ൽ കുവൈറ്റ് സിറ്റി അടിസ്ഥാന സൗകര്യങ്ങളിലും ഡിജിറ്റൽ സേവനങ്ങളിലും വ്യക്തമായ മുന്നേറ്റം രേഖപ്പെടുത്തി. ആരോഗ്യം, സർക്കാർ സേവനങ്ങളുടെ ഗുണനിലവാരം, ഡിജിറ്റൽ പരിവർത്തനം, ആധുനിക സാങ്കേതികവിദ്യകളിലുള്ള ജനങ്ങളുടെ മുന്നേറ്റം എന്നിവയിൽ മുൻനിര പ്രകടനമാണ് നഗരം കാഴ്ചവെച്ചത്. സർവേയിൽ പങ്കെടുത്ത 148 ആഗോള നഗരങ്ങളുടെ പട്ടികയിൽ 95-ാം സ്ഥാനം നേടിയ കുവൈറ്റ് സിറ്റി, തങ്ങളുടെ മൊത്തത്തിലുള്ള തരംതിരിവിൽ ‘സിസിസി’ ലെവൽ നിലനിർത്തി.
റിപ്പോർട്ട് പ്രകാരം ‘ഇൻഫ്രാസ്ട്രക്ചർ ആൻഡ് സിസ്റ്റംസ്’ (അടിസ്ഥാന സൗകര്യങ്ങളും സംവിധാനങ്ങളും) എന്ന മേഖലയിൽ ‘ബി’ റേറ്റിംഗ് നേടാൻ നഗരത്തിന് സാധിച്ചു. ഇത് ‘ടെക്നോളജി ആൻഡ് ഡിജിറ്റൽ സൊല്യൂഷൻസ്’ എന്ന മേഖലയ്ക്ക് ലഭിച്ച ‘സിസിസി’ റേറ്റിംഗിനേക്കാൾ കൂടുതലാണ്. സ്മാർട്ട് പരിഹാരങ്ങൾ വിപുലീകരിക്കുന്നതിനും ഡിജിറ്റൽ സേവനങ്ങൾ കൂടുതൽ മെച്ചപ്പെടുത്തുന്നതിനും നഗരത്തിൽ ശക്തമായ ഒരു അടിത്തറ നിലവിലുണ്ടെന്നാണ് ഇത് സൂചിപ്പിക്കുന്നത്.
നിലവിലുള്ള ഭൗതിക സാഹചര്യങ്ങളും സൗകര്യങ്ങളും, ഒപ്പം ലഭ്യമായ സാങ്കേതികവിദ്യയും വിലയിരുത്തി താമസക്കാരുടെ പ്രതികരണങ്ങളെ അടിസ്ഥാനമാക്കിയാണ് ഐഎംഡി സർവേ തയ്യാറാക്കുന്നത്. ആരോഗ്യം-സുരക്ഷ, ഗതാഗതം, പ്രവർത്തനങ്ങൾ, അവസരങ്ങൾ, ഭരണനിർവഹണം എന്നീ അഞ്ച് പ്രധാന ഘടകങ്ങൾ മുൻനിർത്തിയാണ് നഗരങ്ങളുടെ പ്രകടനം അളക്കുന്നത്.
