കുവൈറ്റ് സിറ്റി: ലഹരി ഉപയോഗിച്ച് വാഹനമോടിക്കൽ, ഡ്യൂട്ടിയിലുണ്ടായിരുന്ന പോലീസ് ഉദ്യോഗസ്ഥരെ അധിക്ഷേപിക്കൽ, അറസ്റ്റ് തടസ്സപ്പെടുത്തൽ, ഔദ്യോഗിക പട്രോൾ വാഹനം തകർക്കൽ എന്നീ കുറ്റങ്ങൾക്ക് മുപ്പതുകാരനായ കുവൈറ്റ് പൗരനെ ജ്ലീബ് പോലീസ് സ്റ്റേഷനിൽ കസ്റ്റഡിയിലെടുത്തു. ജ്ലീബ് മേഖലയിൽ അപകടകരമായ രീതിയിൽ സഞ്ചരിച്ച ഫോർ വീൽ ഡ്രൈവ് വാഹനം ശ്രദ്ധയിൽപ്പെട്ട പട്രോളിംഗ് സംഘം വാഹനം തടഞ്ഞുനിർത്തി പരിശോധിക്കുകയായിരുന്നു. പരിശോധനയിൽ ഡ്രൈവർ അജ്ഞാത ലഹരിവസ്തു ഉപയോഗിച്ചതായി പോലീസ് കണ്ടെത്തി. ഈ സമയം ഇയാളുടെ പിതാവും ഇളയ സഹോദരനും വാഹനത്തിൽ ഒപ്പമുണ്ടായിരുന്നു.
തുടർന്ന് വാഹനം പിതാവിന് കൈമാറാനും പ്രതിയോട് പട്രോൾ വാഹനത്തിൽ കയറാനും ഉദ്യോഗസ്ഥർ ആവശ്യപ്പെട്ടു. എന്നാൽ ഇയാൾ ഉദ്യോഗസ്ഥരെ ക്രൂരമായി അധിക്ഷേപിക്കുകയും അറസ്റ്റിനെ ശക്തിയായി എതിർക്കുകയുമായിരുന്നു. തുടർന്ന് ബലപ്രയോഗത്തിലൂടെ ഇയാളെ കീഴ്പ്പെടുത്തി പട്രോൾ വാഹനത്തിലാക്കി. വാഹനത്തിനുള്ളിൽ വെച്ച് പ്രതി മനഃപൂർവ്വം പട്രോൾ കാറിന് കേടുപാടുകൾ വരുത്തുകയും ചെയ്തു. പിന്നീട് സ്ഥലത്തെത്തിയ അന്വേഷണ ഉദ്യോഗസ്ഥൻ വാഹനത്തിനുണ്ടായ നാശനഷ്ടങ്ങൾ സ്ഥിരീകരിച്ചു.
ഇൻവെസ്റ്റിഗേറ്ററുടെ ഉത്തരവിനെ തുടർന്ന് പ്രതിയെ പോലീസ് സ്റ്റേഷനിൽ തടങ്കലിൽ പാർപ്പിച്ചു. ഇയാൾ ഉപയോഗിച്ച ലഹരി ഏതാണെന്ന് തിരിച്ചറിയാൻ രക്തസാമ്പിളുകൾ പരിശോധനയ്ക്ക് അയച്ചിട്ടുണ്ട്. ലഹരി ഉപയോഗിച്ച് വാഹനമോടിക്കൽ, ക്രമസമാധാന പാലകരെ അധിക്ഷേപിക്കൽ, പൊതുമുതൽ നശിപ്പിക്കൽ എന്നീ കുറ്റങ്ങൾ ചുമത്തി ഇയാളെ ഉടൻ ജുഡീഷ്യറിക്ക് കൈമാറും. ലഹരി ഉപയോഗിച്ച് വാഹനമോടിച്ചതിന് തടവുശിക്ഷയും വാഹനം കണ്ടുകെട്ടലുമാണ് ശിക്ഷ ലഭിക്കുക. ഇതിനുപുറമെ, ഡ്യൂട്ടിയിലുള്ള ഉദ്യോഗസ്ഥരെ അധിക്ഷേപിച്ചതിന് തടവുശിക്ഷയോ 2,000 കുവൈറ്റ് ദിനാർ വരെ പിഴയോ കൂടാതെ പൊതുമുതൽ നശിപ്പിച്ചതിനുള്ള ശിക്ഷയും പ്രതി നേരിടേണ്ടി വരും.
