കുവൈത്ത്സിറ്റി: മിഡിൽ ഈസ്റ്റിൽ തുടരുന്ന സൈനിക സംഘർഷങ്ങൾ ഗൾഫ് രാജ്യങ്ങളുടെ സാമ്പത്തിക സ്ഥിരതയ്ക്കും സുരക്ഷയ്ക്കും വെല്ലുവിളിയാകുന്നതിനിടെ, സൗദി അറേബ്യയ്ക്കെതിരായ ഹൂത്തി ആക്രമണങ്ങളെ അപലപിച്ച ഐക്യരാഷ്ട്രസഭയുടെ സുരക്ഷാ കൗൺസിൽ നിലപാടിനെ കുവൈത്ത് സ്വാഗതം ചെയ്തു.
സൗദിയിലെ സാധാരണ ജനങ്ങളെയും വിമാനത്താവളങ്ങൾ ഉൾപ്പെടെയുള്ള സുപ്രധാന അടിസ്ഥാന സൗകര്യങ്ങളെയും ലക്ഷ്യമിട്ടുള്ള ആക്രമണങ്ങളെ കുവൈത്ത് വിദേശകാര്യ മന്ത്രാലയം ശക്തമായി അപലപിച്ചു. ചെങ്കടലിലെയും ബാബ് അൽ മന്ദബ് കടലിടുക്കിലെയും കപ്പൽ ഗതാഗതത്തിന് ഭീഷണി ഉയർത്തുന്ന നടപടികളും അംഗീകരിക്കാനാവില്ലെന്ന് മന്ത്രാലയം വ്യക്തമാക്കി.സൗദി അറേബ്യയുടെ സുരക്ഷ ഗൾഫ് സഹകരണ കൗൺസിൽ രാജ്യങ്ങളുടെയും കുവൈത്തിന്റെയും സുരക്ഷയുമായി അഭേദ്യമായി ബന്ധപ്പെട്ടിരിക്കുന്നുവെന്നും സ്വന്തം രാജ്യത്തെയും ജനങ്ങളെയും സംരക്ഷിക്കാൻ സൗദിക്കുള്ള അവകാശത്തെ പിന്തുണയ്ക്കുന്നതായും കുവൈത്ത് അറിയിച്ചു.അതേസമയം, അമേരിക്കയും ഇറാനും തമ്മിലുള്ള സംഘർഷത്തിന്റെ പ്രത്യാഘാതങ്ങൾ നേരിടാൻ ഗൾഫ് രാജ്യങ്ങൾ സ്വീകരിച്ച സാമ്പത്തിക പരിഷ്കാരങ്ങളും മുൻകരുതൽ നടപടികളും സഹായകമായതായി അന്താരാഷ്ട്ര നാണയനിധി വ്യക്തമാക്കി.
ബാങ്കോക്കിൽ നടന്ന ഐഎംഎഫ്-ലോകബാങ്ക് വാർഷിക യോഗത്തിൽ സംസാരിച്ച ഐഎംഎഫ് മാനേജിങ് ഡയറക്ടർ ക്രിസ്റ്റലീന ജോർജിയേവ, ഗൾഫ് രാജ്യങ്ങളുടെ സാമ്പത്തിക പരിഷ്കാരങ്ങളെ പ്രശംസിച്ചു. എന്നാൽ മേഖലയിലെ സംഘർഷങ്ങളുടെ പശ്ചാത്തലത്തിൽ മിഡിൽ ഈസ്റ്റ്, ഉത്തരാഫ്രിക്ക മേഖലയുടെ സാമ്പത്തിക വളർച്ചാ പ്രവചനം രണ്ട് ശതമാനം പോയിന്റ് കുറച്ചതായും ഐഎംഎഫ് അറിയിച്ചു.മിക്ക ഗൾഫ് രാജ്യങ്ങളും മുൻകാല സാമ്പത്തിക പരിഷ്കാരങ്ങളിലൂടെ ശക്തമായ സാമ്പത്തിക കരുതൽ ശേഖരത്തോടെയാണ് നിലവിലെ പ്രതിസന്ധിയെ നേരിടുന്നതെന്ന് സൗദി ധനമന്ത്രി മുഹമ്മദ് അൽ ജദാൻ പറഞ്ഞു. എന്നാൽ യുദ്ധവും വ്യാപാര തടസ്സങ്ങളും ഊർജ, ഭക്ഷ്യസുരക്ഷയെ ബാധിക്കുകയും വിലക്കയറ്റത്തിനും സാമ്പത്തിക അസ്ഥിരതയ്ക്കും കാരണമാകുകയും ചെയ്യുമെന്ന് അദ്ദേഹം മുന്നറിയിപ്പ് നൽകി.
ഇതിനിടെ, സൗദിയിലെ യാൻബുവിനെ ലക്ഷ്യമിട്ട ബാലിസ്റ്റിക് മിസൈലും ചെങ്കടലിന് മുകളിലൂടെ എത്തിയ രണ്ട് ക്രൂസ് മിസൈലുകളും റിയാദിനെയും തെക്കൻ മേഖലകളെയും ലക്ഷ്യമിട്ട മൂന്ന് ഡ്രോണുകളും തകർത്തതായി യെമനിലെ സഖ്യസേന അറിയിച്ചു.യെമനിലെ ഏദൻ അന്താരാഷ്ട്ര വിമാനത്താവളത്തിൽ വെള്ളിയാഴ്ച രണ്ട് ബാലിസ്റ്റിക് മിസൈലുകൾ പതിച്ചതായും റിപ്പോർട്ടുണ്ട്. ഒരാഴ്ചയ്ക്കിടെ വിമാനത്താവളത്തിന് നേരെയുണ്ടാകുന്ന രണ്ടാമത്തെ ആക്രമണമാണിത്. സംഭവത്തിൽ ആളപായമില്ലെങ്കിലും കെയ്‌റോയിലേക്ക് പുറപ്പെടാനിരുന്ന യെമനിയ എയർവേയ്‌സ് വിമാനവുമായി ബന്ധപ്പെട്ട് അടിയന്തര സുരക്ഷാ നടപടികൾ സ്വീകരിച്ചു.
അതേസമയം, സൗദി അറേബ്യയുടെ സുരക്ഷയും പരമാധികാരവും സംരക്ഷിക്കാൻ ആവശ്യമായ സഹായം നൽകാൻ ഈജിപ്ത് തയ്യാറാണെന്ന് പ്രസിഡന്റ് അബ്ദുൽ ഫത്താഹ് അൽ സിസി വ്യക്തമാക്കി. സൈനിക ഇടപെടൽ ആവശ്യമായി വന്നാൽ പാർലമെന്റിന്റെ അനുമതി തേടുമെന്നും അദ്ദേഹം അറിയിച്ചു.മേഖലയിലെ സംഘർഷങ്ങൾ കൂടുതൽ രൂക്ഷമാകുന്ന സാഹചര്യത്തിൽ ഗൾഫ് രാജ്യങ്ങളുടെ സുരക്ഷ ഉറപ്പാക്കുന്നതിനൊപ്പം സാമ്പത്തിക സ്ഥിരത സംരക്ഷിക്കാനും അന്താരാഷ്ട്ര സഹകരണവും തുടർച്ചയായ സാമ്പത്തിക പരിഷ്കാരങ്ങളും അനിവാര്യമാണെന്നാണ് വിലയിരുത്തൽ.
