കുവൈത്ത്സിറ്റി: കുവൈത്തിലെ സാൽമിയയിൽ മുൻവൈരാഗ്യത്തെ തുടർന്ന് കുവൈത്ത് പൗരനും ഇറാഖി പ്രവാസിയും തമ്മിലുണ്ടായ തർക്കം കത്തിക്കുത്തിൽ കലാശിച്ചു. സംഭവത്തിൽ ഇരുവർക്കും തലയിലും ശരീരത്തിന്റെ വിവിധ ഭാഗങ്ങളിലും മുറിവേറ്റു.1994-ൽ ജനിച്ച ഇറാഖി പ്രവാസിയും കുവൈത്ത് പൗരനും തമ്മിലാണ് സംഘർഷമുണ്ടായതെന്ന് സുരക്ഷാ വൃത്തങ്ങൾ അറിയിച്ചു.
ഇരുവരും തമ്മിൽ നേരത്തെ നിലനിന്നിരുന്ന തർക്കം ഒത്തുതീർപ്പാക്കുന്നതിനായി സാൽമിയയിലെ ഒഴിഞ്ഞ സ്ഥലത്ത് കൂടിക്കാഴ്ച നടത്താൻ തീരുമാനിക്കുകയായിരുന്നു.എന്നാൽ പ്രശ്നം പരിഹരിക്കുന്നതിനായി ആരംഭിച്ച ചർച്ച പെട്ടെന്ന് വാക്കുതർക്കത്തിലേക്കും തുടർന്ന് കൈയാങ്കളിയിലേക്കും മാറി. പരസ്പരം മർദിക്കുന്നതിനിടെ ഇരുവരും കത്തികൾ ഉപയോഗിച്ച് ആക്രമിക്കുകയായിരുന്നു.കത്തിക്കുത്തിൽ കുവൈത്ത് പൗരനും ഇറാഖി പ്രവാസിക്കും തലയിലും ശരീരത്തിന്റെ വിവിധ ഭാഗങ്ങളിലും മുറിവേറ്റതായി സുരക്ഷാ ഉദ്യോഗസ്ഥർ വ്യക്തമാക്കി.
പ്രശ്നങ്ങൾ രമ്യമായി പരിഹരിക്കാനായി നടത്തിയ കൂടിക്കാഴ്ചയാണ് ഒടുവിൽ രക്തരൂക്ഷിതമായ സംഘർഷത്തിൽ കലാശിച്ചത്.സംഭവവുമായി ബന്ധപ്പെട്ട് പോലീസ് കേസ് രജിസ്റ്റർ ചെയ്തിട്ടുണ്ട്. സംഘർഷത്തിലേക്ക് നയിച്ച സാഹചര്യങ്ങളും ഇരുവരുടെയും ഉത്തരവാദിത്തവും കണ്ടെത്തുന്നതിനായി ബന്ധപ്പെട്ട അധികൃതർ അന്വേഷണം തുടരുകയാണ്.സംഭവത്തിൽ ഉൾപ്പെട്ടവർക്കെതിരായ തുടർ നിയമനടപടികൾ അന്വേഷണത്തിന്റെ അടിസ്ഥാനത്തിൽ സ്വീകരിക്കുമെന്ന് സുരക്ഷാ വൃത്തങ്ങൾ അറിയിച്ചു.
