കുവൈത്ത് സിറ്റി: കുവൈത്തിലെ മുബാറക് അൽ-കബീർ ഗവർണറേറ്റ് സെക്യൂരിറ്റി ഡയറക്ടറേറ്റും ബന്ധപ്പെട്ട അധികൃതരും ചേർന്ന് സബാഹ് അൽ-സലേം പ്രദേശത്ത് നടത്തിയ വിപുലമായ സംയുക്ത സുരക്ഷാ പരിശോധനയിൽ നിരവധി നിയമലംഘനങ്ങൾ കണ്ടെത്തി. സുരക്ഷ ശക്തമാക്കുന്നതിനും പിടികിട്ടേണ്ടവരെയും നിയമലംഘകരെയും പിടികൂടുന്നതിനുമായി ആഭ്യന്തര മന്ത്രാലയത്തിന്റെ നേതൃത്വത്തിലാണ് ഈ കാമ്പെയ്ൻ സംഘടിപ്പിച്ചത്. സുരക്ഷാ-ഗതാഗത വിഭാഗങ്ങളിലുമായി ആകെ 212 നിയമനടപടികളാണ് പരിശോധനയിൽ സ്വീകരിച്ചത്.
പരിശോധനയുടെ ഭാഗമായി 61 ഗതാഗത നിയമലംഘനങ്ങൾ രേഖപ്പെടുത്തുകയും, 21 റെസിഡൻസി നിയമലംഘകരെയും ഒളിവിൽ കഴിഞ്ഞിരുന്ന 22 പേരെയും അധികൃതർ പിടികൂടുകയും ചെയ്തു. തിരിച്ചറിയൽ രേഖകൾ ഇല്ലാതിരുന്ന രണ്ട് പേരെയും മയക്കുമരുന്നുമായി പിടിയിലായ ഒരാളെയും സുരക്ഷാ ഉദ്യോഗസ്ഥർ കസ്റ്റഡിയിലെടുത്തു. ഇതിനുപുറമെ റോഡരികുകളിൽ ഉപേക്ഷിക്കപ്പെട്ട നിലയിൽ കണ്ടെത്തിയ ഒൻപത് വാഹനങ്ങളും പിടിച്ചെടുത്തിട്ടുണ്ട്.
വിവിധ വകുപ്പുകളുടെ നേതൃത്വത്തിൽ നടന്ന പരിശോധനകളിൽ പബ്ലിക് അതോറിറ്റി ഫോർ ഫുഡ് ആൻഡ് ന്യൂട്രിഷൻ 7 ലംഘനങ്ങളും, പബ്ലിക് അതോറിറ്റി ഫോർ മാൻപവർ 6 ലംഘനങ്ങളും, വാണിജ്യ-വ്യവസായ മന്ത്രാലയം 44 ലംഘനങ്ങളും രജിസ്റ്റർ ചെയ്തു. പിടിയിലായവർക്കെതിരെയും നിയമലംഘകർക്കെതിരെയും അതത് വകുപ്പുകളുടെ നിയമപ്രകാരമുള്ള കർശന നടപടികൾ സ്വീകരിച്ചതായി ആഭ്യന്തര മന്ത്രാലയം വ്യക്തമാക്കി.
