കുവൈത്ത്: കുവൈത്തിൽ ഓൺലൈൻ തട്ടിപ്പുകളും സാമ്പത്തിക വഞ്ചനാശ്രമങ്ങളും സംബന്ധിച്ച പരാതികൾ വർധിക്കുന്ന സാഹചര്യത്തിൽ പൊതുജനങ്ങൾക്ക് ജാഗ്രതാ നിർദേശവുമായി കമ്മ്യൂണിക്കേഷൻസ് ആൻഡ് ഇൻഫർമേഷൻ ടെക്നോളജി റെഗുലേറ്ററി അതോറിറ്റി (CITRA). 2026-ലെ മൂന്നാം പാദത്തിൽ, ജൂലൈ മുതൽ സെപ്റ്റംബർ വരെയുള്ള മൂന്ന് മാസത്തിനിടെ, തട്ടിപ്പുകളുമായി ബന്ധപ്പെട്ട 621 പരാതികൾ കൈകാര്യം ചെയ്തതായി അതോറിറ്റി അറിയിച്ചു.
വ്യാജ വെബ്‌സൈറ്റുകൾ വഴിയുള്ള തട്ടിപ്പ് ശ്രമങ്ങളാണ് ഏറ്റവും കൂടുതൽ റിപ്പോർട്ട് ചെയ്തിരിക്കുന്നത്. സോഷ്യൽ മീഡിയ, ഫോൺ കോളുകൾ, വാട്‌സ്ആപ്പ് സന്ദേശങ്ങൾ എന്നിവ വഴിയും നിരവധി തട്ടിപ്പ് ശ്രമങ്ങൾ നടന്നതായി അധികൃതർ വ്യക്തമാക്കി.തട്ടിപ്പ് പരാതികളുടെ കണക്കുകൾ ഇങ്ങനെ- വെബ്‌സൈറ്റുകൾ വഴി: 276 പരാതികൾ- സോഷ്യൽ മീഡിയ വഴി: 163 പരാതികൾ- ഫോൺ കോളുകൾ വഴി: 104 പരാതികൾ- വാട്‌സ്ആപ്പ് വഴി: 76 പരാതികൾ- എസ്എംഎസ് സന്ദേശങ്ങൾ വഴി: 2 പരാതികൾആകെ റിപ്പോർട്ട് ചെയ്ത 621 പരാതികളിൽ ഏകദേശം 44 ശതമാനവും വെബ്‌സൈറ്റുകളുമായി ബന്ധപ്പെട്ടവയാണ്.
സംശയാസ്പദമായ വെബ്‌സൈറ്റ് ലിങ്കുകൾ, ഫോൺ കോളുകൾ, സോഷ്യൽ മീഡിയ സന്ദേശങ്ങൾ എന്നിവയോട് പ്രതികരിക്കുമ്പോൾ അതീവ ജാഗ്രത പാലിക്കണമെന്ന് CITRA മുന്നറിയിപ്പ് നൽകി. വിശ്വാസ്യത ഉറപ്പാക്കാത്ത വ്യക്തികൾക്കോ സ്ഥാപനങ്ങൾക്കോ വ്യക്തിഗത വിവരങ്ങളും ബാങ്കിങ് വിവരങ്ങളും കൈമാറരുതെന്നും അധികൃതർ നിർദേശിച്ചു.സംശയകരമായ സന്ദേശങ്ങളോ ലിങ്കുകളോ ഫോൺ കോളുകളോ ലഭിച്ചാൽ ബന്ധപ്പെട്ട അധികൃതർക്ക് റിപ്പോർട്ട് ചെയ്യണമെന്നും പൊതുജനങ്ങളോട് ആവശ്യപ്പെട്ടു.ടെലികമ്മ്യൂണിക്കേഷൻ നിരീക്ഷണ സംവിധാനവും ശക്തമാക്കുന്നുഅതേസമയം, രാജ്യത്തെ ടെലികമ്മ്യൂണിക്കേഷൻ സംവിധാനങ്ങളുടെ നിരീക്ഷണം കൂടുതൽ കാര്യക്ഷമമാക്കുന്നതിനുള്ള നടപടികളും CITRA തുടരുകയാണ്.
ഇതിന്റെ ഭാഗമായി അതോറിറ്റിയുടെ ഫീൽഡ് മോണിറ്ററിങ് വിഭാഗത്തിലെ ഉദ്യോഗസ്ഥർ ഒക്ടോബർ 19 മുതൽ 21 വരെ ജർമനിയിലെ റോഡെ ആൻഡ് ഷ്വാർസ് (Rohde & Schwarz) നിർമാണ കേന്ദ്രത്തിൽ സാങ്കേതിക സന്ദർശനം നടത്തി.രാജ്യത്തെ റേഡിയോ ഫ്രീക്വൻസി സ്പെക്ട്രം നിരീക്ഷിക്കുന്നതിനും വിശകലനം ചെയ്യുന്നതിനുമുള്ള ഓട്ടോമേറ്റഡ് സംവിധാനം വികസിപ്പിക്കുന്ന പദ്ധതിയുടെ ഭാഗമായിരുന്നു സന്ദർശനം.കുവൈത്തിലേക്ക് അയയ്ക്കുന്നതിന് മുമ്പായി മൊബൈൽ വയർലെസ് നിരീക്ഷണ സ്റ്റേഷനുകളിലെ സാങ്കേതിക ഉപകരണങ്ങളും അംഗീകൃത മാനദണ്ഡങ്ങൾ പാലിക്കുന്നുണ്ടോയെന്നതും സംഘം പരിശോധിച്ചു.
രാജ്യത്തെ ഫ്രീക്വൻസി ഉപയോഗത്തിന്മേലുള്ള നിരീക്ഷണവും നിയന്ത്രണവും കൂടുതൽ ശക്തമാക്കുകയാണ് പദ്ധതിയുടെ ലക്ഷ്യം.ഓൺലൈൻ തട്ടിപ്പുകളിൽ നിന്ന് രക്ഷപ്പെടാൻ ഔദ്യോഗിക വെബ്‌സൈറ്റുകളും വിശ്വസനീയമായ സേവനങ്ങളും മാത്രം ഉപയോഗിക്കണമെന്നും സംശയാസ്പദമായ ലിങ്കുകളിൽ പ്രവേശിക്കുന്നതിന് മുമ്പ് അവയുടെ ആധികാരികത ഉറപ്പാക്കണമെന്നും അധികൃതർ ഓർമിപ്പിച്ചു.
