കുവൈത്ത് സിറ്റി: കുവൈത്തിൽ ജോലി ചെയ്യുന്ന വിദേശ നഴ്സുമാർക്ക് പ്രതിമാസം 600 മുതൽ 1,500 കുവൈത്ത് ദിനാർ വരെ അടിസ്ഥാന ശമ്പളം ലഭിക്കാൻ സാധ്യതയുണ്ടെന്ന് പുതിയ റിപ്പോർട്ട്. വിദ്യാഭ്യാസ യോഗ്യത, പ്രവൃത്തിപരിചയം, ജോലി ചെയ്യുന്ന ആശുപത്രി, സ്പെഷ്യലൈസേഷൻ എന്നിവയുടെ അടിസ്ഥാനത്തിലാണ് ശമ്പളത്തിൽ വ്യത്യാസമുണ്ടാകുന്നത്.
നൈജീരിയൻ വാർത്താ വെബ്സൈറ്റ് നവംബർ ഒന്നിന് പ്രസിദ്ധീകരിച്ച റിപ്പോർട്ടിലാണ് കുവൈത്തിലെ വിദേശ നഴ്സുമാരുടെ 2026ലെ ശമ്പള കണക്കുകൾ വിശദീകരിക്കുന്നത്.റിപ്പോർട്ട് പ്രകാരം അസിസ്റ്റന്റ് നഴ്സുമാർക്കും നഴ്സിങ് ടെക്നീഷ്യൻമാർക്കും ഏകദേശം 400 ദിനാർ പ്രതിമാസ ശമ്പളം ലഭിക്കാം. പുതുതായി ജോലിയിൽ പ്രവേശിക്കുന്ന രജിസ്റ്റേർഡ് സ്റ്റാഫ് നഴ്സുമാർക്ക് 600 ദിനാറും പ്രവൃത്തിപരിചയമുള്ള നഴ്സുമാർക്ക് 800 ദിനാറും ലഭിക്കാമെന്നാണ് കണക്കാക്കുന്നത്.
പ്രത്യേക പരിശീലനവും സർട്ടിഫിക്കേഷനുമുള്ള നഴ്സുമാർക്ക് 1,000 ദിനാർ വരെയും സീനിയർ നഴ്സുമാർക്കും ചാർജ് നഴ്സുമാർക്കും 1,200 മുതൽ 1,500 ദിനാർ വരെയും പ്രതിമാസ ശമ്പളം ലഭിക്കാമെന്നും റിപ്പോർട്ടിൽ പറയുന്നു.അടിസ്ഥാന ശമ്പളത്തിന് പുറമെ താമസസൗകര്യം അല്ലെങ്കിൽ ഹൗസിങ് അലവൻസ്, യാത്രാസൗകര്യം, ആരോഗ്യ ഇൻഷുറൻസ്, വാർഷിക വിമാന ടിക്കറ്റ്, ഷിഫ്റ്റ് അലവൻസ് തുടങ്ങിയ ആനുകൂല്യങ്ങളും പല ആശുപത്രികളും നൽകുന്നുണ്ട്.കുവൈത്തിലെ സർക്കാർ ആശുപത്രികളായ അമീരി, അദാൻ, ജഹ്റ, ഫർവാനിയ, മുബാറക് അൽ കബീർ, ജാബർ ആശുപത്രികൾ എന്നിവിടങ്ങളിലും വിവിധ സ്വകാര്യ ആശുപത്രികളിലും വിദേശ നഴ്സുമാർക്ക് തൊഴിൽ അവസരങ്ങളുണ്ട്.
ഐസിയു, എമർജൻസി, ഡയാലിസിസ്, ഓപ്പറേഷൻ തിയേറ്റർ, നവജാത ശിശു പരിചരണം തുടങ്ങിയ മേഖലകളിൽ പ്രത്യേക പരിശീലനവും പരിചയവുമുള്ളവർക്ക് കൂടുതൽ ശമ്പളം ലഭിക്കാൻ സാധ്യതയുണ്ട്.അതേസമയം, റിപ്പോർട്ടിൽ പറയുന്ന ശമ്പള കണക്കുകൾ കുവൈത്ത് ആരോഗ്യ മന്ത്രാലയം ഔദ്യോഗികമായി പ്രഖ്യാപിച്ച പുതിയ ശമ്പള നിരക്കുകളല്ല. റിക്രൂട്ട്മെന്റ് ഓഫറുകളും തൊഴിൽ വിപണിയിലെ വിവരങ്ങളും അടിസ്ഥാനമാക്കിയുള്ള ഏകദേശ കണക്കുകളാണ്.
ജോലിക്കായി കുവൈത്തിലേക്ക് വരുന്ന വിദേശ നഴ്സുമാർ അടിസ്ഥാന ശമ്പളം മാത്രമല്ല, താമസസൗകര്യം, ഓവർടൈം, അവധി, വിമാന ടിക്കറ്റ്, സർവീസ് ആനുകൂല്യങ്ങൾ എന്നിവയും പരിശോധിക്കണമെന്ന് റിപ്പോർട്ട് നിർദേശിക്കുന്നു.ജോലിയിൽ പ്രവേശിക്കുന്നതിന് മുമ്പ് ശമ്പളവും മറ്റ് ആനുകൂല്യങ്ങളും വ്യക്തമായി രേഖപ്പെടുത്തിയ തൊഴിൽ കരാർ ഉറപ്പുവരുത്തണമെന്നും റിപ്പോർട്ടിൽ പറയുന്നു.വാർത്തയുടെ അടിസ്ഥാനമായ ശമ്പള നിരക്കുകൾ തൊഴിൽ വിപണിയിലെ ഏകദേശ കണക്കുകളാണ്; എല്ലാ ആശുപത്രികൾക്കും ബാധകമായ ഔദ്യോഗിക ശമ്പള സ്കെയിലല്ല.
