കുവൈത്ത്: ഇന്ത്യൻ ബിസിനസ് ആൻഡ് പ്രൊഫഷണൽ കൗൺസിൽ (ഐബിപിസി) കുവൈത്ത്, “Geopolitics and Business: What Has Changed in the GCC?” എന്ന വിഷയത്തിൽ പ്രത്യേക ബിസിനസ് സെഷൻ സംഘടിപ്പിച്ചു. സാൽമിയയിലെ മില്ലേനിയം ഹോട്ടൽ ആൻഡ് കൺവെൻഷൻ സെന്ററിലായിരുന്നു പരിപാടി.
കുവൈത്തിലെ ഇന്ത്യൻ ബിസിനസ്, പ്രൊഫഷണൽ സമൂഹത്തിലെ പ്രമുഖർ പരിപാടിയിൽ പങ്കെടുത്തു. മുതിർന്ന വ്യവസായികൾ, സംരംഭകർ, ധനകാര്യ വിദഗ്ധർ, വിവിധ മേഖലകളിലെ പ്രൊഫഷണലുകൾ തുടങ്ങിയവരുടെ സാന്നിധ്യം ശ്രദ്ധേയമായി. മാറിവരുന്ന ആഗോള ഭൗമരാഷ്ട്രീയ സാഹചര്യങ്ങളും അവ ജിസിസി സമ്പദ്‌വ്യവസ്ഥയിലും ബിസിനസ് മേഖലയിലും സൃഷ്ടിക്കുന്ന പ്രതിഫലനങ്ങളും മനസ്സിലാക്കുന്നതിനുള്ള വേദിയായി സെഷൻ മാറി.
മാർമോർ മെന ഇന്റലിജൻസ് സിഇഒയും കുവൈത്ത് ഫിനാൻഷ്യൽ സെന്റർ (മർകസ്) സാമ്പത്തിക ഉപദേഷ്ടാവുമായ എം. ആർ. രഘു മുഖ്യപ്രഭാഷണം നടത്തി. നിക്ഷേപ മാനേജ്മെന്റ്, മൂലധന വിപണി, റിസ്ക് മാനേജ്മെന്റ്, സാമ്പത്തിക വിശകലനം, അസറ്റ് മാനേജ്മെന്റ്, ഊർജ വിപണി തുടങ്ങിയ മേഖലകളിൽ വിപുലമായ അനുഭവസമ്പത്തുള്ള ജിസിസിയിലെ പ്രമുഖ സാമ്പത്തിക വിദഗ്ധനാണ് അദ്ദേഹം.
ഐബിപിസി കുവൈത്ത് ജോയിന്റ് സെക്രട്ടറി സുനിത് അറോറ സ്വാഗതം ആശംസിച്ചു. ചെയർമാൻ ഡോ. കൈസർ ടി. ഷാക്കിർ അധ്യക്ഷ പ്രസംഗം നടത്തി. ജിസിസിയിലെ വ്യാപാരം, നിക്ഷേപം, വിപണികൾ, ബിസിനസ് ആത്മവിശ്വാസം എന്നിവയെ സ്വാധീനിക്കുന്നതിൽ ഭൗമരാഷ്ട്രീയ സംഭവവികാസങ്ങൾക്ക് വർധിച്ചുവരുന്ന പ്രാധാന്യം അദ്ദേഹം ചൂണ്ടിക്കാട്ടി.ഐബിപിസി വൈസ് ചെയർമാൻ ഗൗരവ് ഒബ്റോയ്, സെക്രട്ടറി സുരേഷ് കെ. പി., ട്രഷറർ കൃഷ്ണൻ സൂര്യകാന്ത് എന്നിവരും പരിപാടിയിൽ പങ്കെടുത്തു.ജിസിസിയെ സ്വാധീനിക്കുന്ന പുതിയ ഭൗമരാഷ്ട്രീയ സാഹചര്യങ്ങളെക്കുറിച്ച് എം. ആർ. രഘു വിശദമായി സംസാരിച്ചു.
വിവിധ പ്രതിസന്ധികളെ നേരിടുന്നതിൽ ജിസിസി മേഖല ശക്തമായ പ്രതിരോധശേഷി പ്രകടിപ്പിച്ചിട്ടുണ്ടെങ്കിലും, തുടർന്നും ഉണ്ടാകാവുന്ന വിപണി ചാഞ്ചാട്ടങ്ങൾക്കും അനിശ്ചിതത്വങ്ങൾക്കും ബിസിനസ് സ്ഥാപനങ്ങൾ സജ്ജരാകണമെന്ന് അദ്ദേഹം അഭിപ്രായപ്പെട്ടു.വിതരണ ശൃംഖലയുടെ സുരക്ഷയും സ്ഥിരതയും, ധനസമാഹരണ സാഹചര്യങ്ങൾ, ഇൻഷുറൻസ്-റിസ്ക് ചെലവുകൾ, ക്യാഷ് ഫ്ലോ ആസൂത്രണം, വിവിധ സാധ്യതകൾ മുൻനിർത്തിയുള്ള റിസ്ക് മാനേജ്മെന്റ് തുടങ്ങിയ വിഷയങ്ങൾ അവതരണത്തിൽ വിശദമായി ചർച്ച ചെയ്തു.
തുടർന്ന് നടന്ന സംവാദത്തിലും ചോദ്യോത്തര സെഷനിലും കുവൈത്ത് ആസ്ഥാനമായി പ്രവർത്തിക്കുന്ന സ്ഥാപനങ്ങൾക്ക് ഭൗമരാഷ്ട്രീയ വെല്ലുവിളികളെ എങ്ങനെ ഫലപ്രദമായി നേരിടാമെന്നും ബിസിനസ് പ്രവർത്തനങ്ങളുടെ തുടർച്ച ഉറപ്പാക്കാൻ സ്വീകരിക്കേണ്ട നടപടികൾ എന്തൊക്കെയാണെന്നും ചർച്ച ചെയ്തു.
സദസ്സിന്റെ സജീവ പങ്കാളിത്തം സെഷനെ ശ്രദ്ധേയമാക്കി.എം. ആർ. രഘുവിന്റെ ‘Blueprint for Billions: Mastering India’s Equity Market’ എന്ന പുസ്തകത്തിന്റെ എട്ട് കോപ്പികൾ നറുക്കെടുപ്പിലൂടെ പങ്കെടുത്തവർക്ക് സമ്മാനിച്ചു. ഐബിപിസി കുവൈത്തിന്റെ ഉപഹാരം ചെയർമാൻ ഡോ. കൈസർ ടി. ഷാക്കിർ എം. ആർ. രഘുവിന് സമ്മാനിച്ചു.
മുഖ്യപ്രഭാഷകൻ, ഐബിപിസി ചെയർമാൻ, എക്സിക്യൂട്ടീവ് കമ്മിറ്റി അംഗങ്ങൾ, പരിപാടിയിൽ പങ്കെടുത്തവർ എന്നിവർ ചേർന്നുള്ള ഗ്രൂപ്പ് ഫോട്ടോയോടെയാണ് ഔദ്യോഗിക പരിപാടികൾ സമാപിച്ചത്. തുടർന്ന് ഡിന്നറും നെറ്റ്‌വർക്കിങ് സെഷനും നടന്നു. കുവൈത്തിലെ ബിസിനസ്-പ്രൊഫഷണൽ സമൂഹത്തിലെ പ്രമുഖരുമായി ആശയങ്ങൾ പങ്കുവയ്ക്കാനും പുതിയ പ്രൊഫഷണൽ ബന്ധങ്ങൾ ശക്തിപ്പെടുത്താനും പരിപാടി മികച്ച അവസരമായി.
