കുവൈറ്റ് വിമാനത്താവളം വീണ്ടും സജീവമാക്കുന്നതിന്റെ ഭാഗമായി അറ്റകുറ്റപ്പണികൾ പുരോഗമിക്കുന്നു.

കുവൈറ്റ് സിറ്റി : മന്ത്രിസഭയുടെ നിർദ്ദേശങ്ങൾക്കനുസൃതമായി അടിസ്ഥാന സൗകര്യങ്ങളുടെയും വിമാനത്താവള സൗകര്യങ്ങളുടെയും അറ്റകുറ്റപ്പണികൾ നടപ്പിലാക്കിയതായും, പ്രധാന വെല്ലുവിളികളെ തരണം ചെയ്യാനും വിമാനത്താവളം കാര്യക്ഷമമായി പ്രവർത്തനം പുനരാരംഭിക്കുന്നതിന് സജ്ജമാക്കാനും ടീമുകളെ പ്രാപ്തരാക്കിയതായും പബ്ലിക് അതോറിറ്റി ഫോർ സിവിൽ ഏവിയേഷൻ പ്രസിഡന്റ് ഷെയ്ഖ് ഹമൂദ് മുബാറക് അൽ-ഹമൂദ് അൽ-സബാഹ് വിശദീകരിച്ചു. വിമാന ഗതാഗതത്തിൽ ഗണ്യമായ പുരോഗതി ഉണ്ടായിട്ടുണ്ട്, ദിവസേനയുള്ള വരവുകളുടെയും പുറപ്പെടലുകളുടെയും എണ്ണം ഏകദേശം 190 വിമാനങ്ങളിൽ എത്തിയിട്ടുണ്ടെന്ന് അദ്ദേഹം പറഞ്ഞു. നിരവധി വിമാനക്കമ്പനികൾ പ്രവർത്തനം പുനരാരംഭിച്ചിട്ടുണ്ട്, ടെർമിനൽ 1-ൽ നടന്നുകൊണ്ടിരിക്കുന്ന അറ്റകുറ്റപ്പണികൾ, പുനരധിവാസം, ഉപകരണ നവീകരണം എന്നിവ പൂർത്തിയാകുമ്പോൾ വിമാനങ്ങളുടെ എണ്ണം ഇനിയും വർദ്ധിക്കുമെന്ന് പ്രതീക്ഷിക്കുന്നു.

അതോടൊപ്പം രാജ്യത്തെ സിവിൽ വ്യോമയാന മേഖലയിൽ സഹകരണം ശക്തമാക്കുന്നതിനും നിക്ഷേപ സാധ്യതകൾ വർദ്ധിപ്പിക്കുന്നതിനുമായി പബ്ലിക് അതോറിറ്റി ഫോർ സിവിൽ ഏവിയേഷൻ പ്രസിഡന്റ് ഷെയ്ഖ് ഹമൂദ് മുബാറക് അൽ-ഹമൂദ് അൽ-സബാഹും കുവൈത്ത് ഡയറക്ട് ഇൻവെസ്റ്റ്‌മെന്റ് പ്രൊമോഷൻ അതോറിറ്റി ഡയറക്ടർ ജനറൽ ഷെയ്ഖ് ഡോ. മിഷാൽ ജാബർ അൽ-അഹമ്മദ് അൽ-സബാഹും തമ്മിൽ കൂടിക്കാഴ്ച നടത്തി. തിങ്കളാഴ്ചയായിരുന്നു വ്യോമയാന മന്ത്രാലയ ആസ്ഥാനത്ത് വെച്ച് ഇരുമേധാവികളും തമ്മിലുള്ള സുപ്രധാന ചർച്ച നടന്നത്.

രാജ്യത്തെ നിക്ഷേപ അന്തരീക്ഷം മെച്ചപ്പെടുത്തുന്നതിനും സിവിൽ വ്യോമയാന മേഖലയുമായി ബന്ധപ്പെട്ട വികസന പദ്ധതികളിൽ സഹകരിച്ച് പ്രവർത്തിക്കുന്നതിനുമുള്ള വിവിധ അവസരങ്ങൾ യോഗം വിലയിരുത്തിയതായി പി എ സി എ വാർത്താക്കുറിപ്പിൽ അറിയിച്ചു. കുവൈത്തിന്റെ ദേശീയ വികസന പദ്ധതികൾക്ക് പിന്തുണ നൽകുന്നതിനൊപ്പം എയർ ട്രാൻസ്‌പോർട്ട് രംഗത്തെ വൻകിട പ്രോജക്റ്റുകൾ പ്രോത്സാഹിപ്പിക്കുന്നതിനെക്കുറിച്ചും ഇരുവിഭാഗവും ചർച്ച ചെയ്തു. വ്യോമയാന, ലോജിസ്റ്റിക്സ് സേവനങ്ങളിൽ കുവൈത്തിനെ ഒരു പ്രമുഖ പ്രാദേശിക ഹബ്ബായി ഉയർത്തിക്കൊണ്ടുവരാൻ ഈ നീക്കം സഹായകരമാകുമെന്നാണ് വിലയിരുത്തൽ.

മറ്റൊരു ഔദ്യോഗിക ചർച്ചയിൽ, കുവൈത്തിലെ ചെക്ക് റിപ്പബ്ലിക് അംബാസഡർ യുറായ് ഖ്മിയേലുമായി സിവിൽ ഏവിയേഷൻ അതോറിറ്റി പ്രസിഡന്റ് ഷെയ്ഖ് ഹമൂദ് മുബാറക് അൽ-സബാഹ് കൂടിക്കാഴ്ച നടത്തി. ജനറൽ അതോറിറ്റി ഓഫ് സിവിൽ ഏവിയേഷൻ ആസ്ഥാനത്ത് നടന്ന യോഗത്തിൽ ഇരുരാജ്യങ്ങളും തമ്മിലുള്ള വ്യോമയാന ബന്ധം കൂടുതൽ ശക്തമാക്കുന്നതിനെക്കുറിച്ചും പൊതുവായ താല്പര്യമുള്ള മറ്റ് വിഷയങ്ങളെക്കുറിച്ചും ഇരുനേതാക്കളും ആശയവിനിമയം നടത്തി.