കുവൈത്ത് സിറ്റി: രാജ്യത്തെ മാധ്യമ നിയമങ്ങളും നിയമാവലികളും ലംഘിച്ച ഏഴ് മാധ്യമ സ്ഥാപനങ്ങൾക്കെതിരെ കുവൈത്ത് വാർത്താവിനിമയ മന്ത്രാലയം നിയമനടപടി സ്വീകരിച്ചു. മാധ്യമ മാനദണ്ഡങ്ങൾ ഉറപ്പുവരുത്തുന്നതിനും ഉത്തരവാദിത്തമുള്ള മാധ്യമ സംസ്കാരം പ്രോത്സാഹിപ്പിക്കുന്നതിനുമുള്ള മന്ത്രാലയത്തിന്റെ കർശന നിലപാടിന്റെ ഭാഗമായാണ് ഈ നടപടി. കൃത്യമായ നിയമങ്ങൾ പാലിക്കുന്നുണ്ടെന്ന് ഉറപ്പാക്കാനും സാമൂഹിക മൂല്യങ്ങളും പൊതു ക്രമവും സംരക്ഷിക്കാനും ഇത്തരം നടപടികൾ അനിവാര്യമാണെന്ന് മന്ത്രാലയം വ്യക്തമാക്കി.
മാധ്യമ സന്ദേശങ്ങളുടെ വിശ്വാസ്യത വർദ്ധിപ്പിക്കാനും പൊതുജനങ്ങൾക്ക് മാധ്യമങ്ങളിലുള്ള വിശ്വാസം കാത്തുസൂക്ഷിക്കാനും മന്ത്രാലയത്തിന്റെ ഇടപെടൽ സഹായിക്കും. കൃത്യമല്ലാത്ത വിവരങ്ങൾ പ്രസിദ്ധീകരിക്കുക, ഔദ്യോഗികമോ വിശ്വസനീയമോ ആയ സ്രോതസ്സുകളിൽ നിന്ന് സ്ഥിരീകരിക്കാതെ വാർത്തകൾ പ്രചരിപ്പിക്കുക തുടങ്ങിയ ഗുരുതരമായ നിയമലംഘനങ്ങളാണ് ഈ സ്ഥാപനങ്ങളുടെ ഭാഗത്തുനിന്ന് ഉണ്ടായതെന്ന് മന്ത്രാലയം ചൂണ്ടിക്കാട്ടി.
ഇത്തരം പ്രവണതകൾ രാജ്യത്തിന്റെ മാധ്യമ മേഖലയുടെ സൽപ്പേരിന് കളങ്കമുണ്ടാക്കുന്നതായും അധികൃതർ നിരീക്ഷിച്ചു. നിയമലംഘനം നടത്തുന്ന ഏതൊരു സ്ഥാപനത്തിനെതിരെയും നിയമനടപടിയുമായി മുന്നോട്ട് പോകാൻ മന്ത്രാലയം മടിക്കില്ല. യാതൊരു വിവേചനവുമില്ലാതെ പൂർണ്ണമായ സുതാര്യതയോടും നീതിയോടും കൂടി എല്ലാവർക്കും നിയമം ഒരുപോലെ ബാധകമാക്കുമെന്നും വാർത്താവിനിമയ മന്ത്രാലയം പ്രസ്താവനയിലൂടെ ആവർത്തിച്ചു.
