കുവൈറ്റ് സിറ്റി: ജഹ്റ റോഡിൽ അമിതവേഗതയിൽ അപകടകരമായ രീതിയിൽ വാഹനമോടിച്ച കുവൈറ്റ് സ്വദേശിയെ ജഹ്റ ട്രാഫിക് ഡിപ്പാർട്ട്മെന്റിലെ ഉദ്യോഗസ്ഥർ അറസ്റ്റ് ചെയ്തു. നിശ്ചിത വേഗപരിധി ലംഘിച്ച് മണിക്കൂറിൽ 180 കിലോമീറ്റർ വേഗതയിലാണ് ഇയാൾ ആഡംബര വാഹനം ഓടിച്ചിരുന്നത്. റോഡുകളിൽ കൃത്യമായ മേൽനോട്ടം ഉറപ്പാക്കുന്നതിനും അമിതവേഗതക്കാരെ കണ്ടെത്തുന്നതിനുമായി ട്രാഫിക് വിഭാഗം നടത്തിവരുന്ന പതിവ് ഫീൽഡ് പരിശോധനകൾക്കിടയിലാണ് ഈ വൻ നിയമലംഘനം അധികൃതരുടെ ശ്രദ്ധയിൽപ്പെട്ടത്.
നിയമലംഘനം കണ്ടെത്തിയ ഉടൻ തന്നെ സുരക്ഷാ ഉദ്യോഗസ്ഥർ വാഹനം തടയുകയും ഡ്രൈവർക്കെതിരെ നിയമനടപടികൾ സ്വീകരിച്ച് ട്രാഫിക് പോലീസ് സ്റ്റേഷനിലേക്ക് മാറ്റുകയും ചെയ്തു. ഇയാളുടെ വാഹനം പോലീസ് കസ്റ്റഡിയിലെടുത്ത് മാറ്റിയിട്ടുണ്ട്. അശ്രദ്ധമായും അമിതവേഗതയിലും വാഹനമോടിക്കുന്നത് മൂലമുണ്ടാകുന്ന അപകടങ്ങൾ കുറയ്ക്കുന്നതിനും, കാൽനടയാത്രക്കാരുടെയും മറ്റ് വാഹനയാത്രക്കാരുടെയും സുരക്ഷ ഉറപ്പാക്കുന്നതിനുമായി രാജ്യത്തെ എല്ലാ ഗവർണറേറ്റുകളിലും ട്രാഫിക് പരിശോധനകൾ വരും ദിവസങ്ങളിലും ശക്തമായി തുടരുമെന്ന് സുരക്ഷാ വൃത്തങ്ങൾ വ്യക്തമാക്കി.
