കുവൈത്ത് സിറ്റി: ഇറാനിൽ നിന്ന് ഉണ്ടായ തുടർച്ചയായ ആക്രമണങ്ങളും ഹോർമുസ് കടലിടുക്കിലൂടെ കപ്പൽ ഗതാഗതത്തിന് ഭീഷണി ഉയർന്ന സാഹചര്യവും പരിഗണിച്ച് കുവൈത്ത് പെട്രോളിയം കോർപ്പറേഷൻ (KPC) എണ്ണ ഉൽപ്പാദനവും റിഫൈനിംഗ് പ്രവർത്തനവും മുൻകരുതൽ നടപടിയായി കുറച്ചതായി അറിയിച്ചു.
റിസ്ക് മാനേജ്മെന്റ് പദ്ധതിയുടെ ഭാഗമായാണ് ഈ നടപടി സ്വീകരിച്ചതെന്ന് കെപിസി വ്യക്തമാക്കി. നിലവിലെ സാഹചര്യത്തിൽ പ്രവർത്തനങ്ങളുടെ തുടർച്ച ഉറപ്പാക്കുന്നതിനായുള്ള മുൻകരുതൽ നടപടിയാണിത് എന്നും അധികൃതർ പറഞ്ഞു. ഈ കുറവ് താൽക്കാലികവും മുൻകരുതൽ സ്വഭാവമുള്ളതുമാണ്, സാഹചര്യം അനുസരിച്ച് പിന്നീട് പുനഃപരിശോധിക്കുമെന്നും കോർപ്പറേഷൻ അറിയിച്ചു. സാഹചര്യം സാധാരണ നിലയിലാകുമ്പോൾ ഉൽപ്പാദനം വീണ്ടും പഴയ നിലയിലേക്ക് പുനഃസ്ഥാപിക്കാൻ പൂർണ സജ്ജതയുണ്ടെന്നും അവർ വ്യക്തമാക്കി.
അതേസമയം, കുവൈത്തിലെ ആഭ്യന്തര വിപണിയുടെ ആവശ്യങ്ങൾ മുഴുവൻ സുരക്ഷിതമായി ലഭ്യമാണെന്നും കെപിസി ഉറപ്പുനൽകി. കുവൈത്തിലെ ദേശീയ സമ്പത്തുകൾ സംരക്ഷിക്കുകയും ജീവനക്കാരുടെ സുരക്ഷ മുൻഗണന നൽകുകയും ആഗോള ഊർജ വിപണിയിലെ സ്ഥിരത നിലനിർത്തുകയും ചെയ്യുന്നതിൽ കെപിസി പ്രതിജ്ഞാബദ്ധമാണെന്നും അധികൃതർ കൂട്ടിച്ചേർത്തു. പുതിയ വിവരങ്ങൾ ഉണ്ടെങ്കിൽ പിന്നീട് അറിയിക്കുമെന്നും അറിയിച്ചു.
