കുവൈത്ത് സിറ്റി: സമീപകാലത്തുണ്ടായ തടസ്സങ്ങൾക്ക് ശേഷം കുവൈത്ത് അന്താരാഷ്ട്ര വിമാനത്താവളത്തിലെ നാലാം ടെർമിനലിൽ നിന്നുള്ള വ്യോമഗതാഗതം പൂർണ്ണമായും സാധാരണ നിലയിലേക്ക് മടങ്ങുന്നു. പ്രമുഖ വിമാനക്കമ്പനികളെല്ലാം തന്നെ കുവൈത്തിലേക്കുള്ള തങ്ങളുടെ സർവീസുകൾ പുനരാരംഭിക്കുന്നതായി പ്രഖ്യാപിച്ചു കഴിഞ്ഞു. ജൂൺ 21 മുതൽ ദോഹ-കുവൈത്ത് സിറ്റി റൂട്ടിൽ പ്രതിദിന സർവീസുകൾ പുനരാരംഭിക്കുമെന്ന് ഖത്തർ എയർവേസ് സ്ഥിരീകരിച്ചു. നാലാം ടെർമിനൽ കേന്ദ്രീകരിച്ചായിരിക്കും ഖത്തർ എയർവേസിന്റെ വിമാനങ്ങൾ സർവീസ് നടത്തുക.
മറ്റ് പ്രമുഖ എയർലൈനുകളായ ഗൾഫ് എയർ, നെസ്മ എയർലൈൻസ്, നൈൽ എയർവേസ് എന്നിവ ജൂൺ 20 മുതൽ സർവീസുകൾ പുനഃസ്ഥാപിച്ചു. ഇതിന് പിന്നാലെ എത്തിഹാദ് എയർവേസ് ജൂൺ 23-നും ഒമാൻ എയർ ജൂൺ 25-നും തങ്ങളുടെ കുവൈത്ത് സർവീസുകൾ പുനരാരംഭിക്കും. പ്രതിസന്ധിക്ക് മുൻപുണ്ടായിരുന്ന പ്രവർത്തന ശേഷിയുടെ 85 ശതമാനവും ഇതിനകം കൈവരിക്കാൻ സാധിച്ചതായി ഖത്തർ എയർവേസ് അറിയിച്ചു. യാത്രാ സൗകര്യങ്ങൾ വർദ്ധിപ്പിക്കുന്നതിനും കാര്യക്ഷമത കൂട്ടുന്നതിനുമായി കമ്പനിയിൽ പുതിയ രണ്ട് തസ്തികകൾ കൂടി ഉൾപ്പെടുത്തി നയപരമായ ചില മാറ്റങ്ങളും ഖത്തർ എയർവേസ് വരുത്തിയിട്ടുണ്ട്.
പല വിമാനങ്ങളും റദ്ദാക്കേണ്ടി വരികയും വൈകുകയും ചെയ്ത ഒരു ചെറിയ പ്രതിസന്ധി ഘട്ടത്തിന് ശേഷം കുവൈത്ത് അന്താരാഷ്ട്ര വിമാനത്താവളത്തിലെ എല്ലാ പ്രവർത്തനങ്ങളും ഇപ്പോൾ സാധാരണ നിലയിലായതായും സമയക്രമങ്ങൾ കൃത്യമായി പാലിക്കുന്നുണ്ടെന്നും വിമാനത്താവള അധികൃതർ വ്യക്തമാക്കി. വിമാനത്താവളത്തിലേക്ക് പുറപ്പെടുന്നതിന് മുൻപായി യാത്രക്കാർ തങ്ങളുടെ വിമാനങ്ങളുടെ കൃത്യമായ സമയവിവരങ്ങൾ ബന്ധപ്പെട്ട എയർലൈൻസുകളുമായോ ഔദ്യോഗിക ചാനലുകളിലൂടെയോ ബന്ധപ്പെട്ട് ഉറപ്പുവരുത്തണമെന്ന് അധികൃതർ അഭ്യർത്ഥിച്ചു. സർവീസുകൾ പുനരാരംഭിച്ചത് ഗൾഫ് മേഖലയിലെ വ്യോമഗതാഗതത്തെ കൂടുതൽ സുഗമമാക്കാൻ സഹായിക്കും.
