കുവൈത്ത്സിറ്റി: ഫർവാനിയ ഏരിയയിലുള്ള ഒരു അപ്പാർട്ട്മെന്റ് കെട്ടിടത്തിലുണ്ടായ തീപിടുത്തം അഗ്നിശമനസേന നിയന്ത്രണവിധേയമാക്കി. വെള്ളിയാഴ്ച വൈകുന്നേരമാണ് സംഭവം നടന്നത്. ഫർവാനിയ, സുബ്ഹാൻ എന്നീ ഫയർ സ്റ്റേഷനുകളിൽ നിന്നുള്ള അഗ്നിശമന സേനാംഗങ്ങൾ സംയുക്തമായാണ് രക്ഷാപ്രവർത്തനം നടത്തിയത്. തീപിടുത്തം ഉണ്ടായ ഉടൻ തന്നെ സ്ഥലത്തെത്തിയ ഫയർഫോഴ്സ് സംഘം കെട്ടിടത്തിൽ പടർന്ന തീ അണയ്ക്കുകയും കൂടുതൽ ഭാഗങ്ങളിലേക്ക് വ്യാപിക്കുന്നത് തടയുകയും ചെയ്തു. ഈ അപകടത്തിൽ ഒരാൾക്ക് പരിക്കേറ്റതായും അധികൃതർ അറിയിച്ചു. പരിക്കേറ്റ വ്യക്തിക്ക് ആവശ്യമായ വൈദ്യസഹായം ലഭ്യമാക്കിയിട്ടുണ്ട്. തീ പൂർണ്ണമായും അണച്ച ശേഷം, അപകടത്തിന്റെ കാരണം കണ്ടെത്താനായി ബന്ധപ്പെട്ട അന്വേഷണ ഉദ്യോഗസ്ഥർക്ക് കെട്ടിടം കൈമാറി. സുരക്ഷാ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പാക്കാൻ തുടർനടപടികൾ സ്വീകരിച്ചുവരികയാണ്.
