കുവൈറ്റ് സിറ്റി: രാജ്യത്തെ 427 വ്യക്തികളുടെ താമസ വിലാസങ്ങൾ തങ്ങളുടെ ഔദ്യോഗിക രേഖകളിൽ നിന്ന് റദ്ദാക്കിയതായി പബ്ലിക് അതോറിറ്റി ഫോർ സിവിൽ ഇൻഫർമേഷൻ (പി.എ.സി.ഐ) അറിയിച്ചു. ഇത് സംബന്ധിച്ച ഔദ്യോഗിക വിജ്ഞാപനം ‘കുവൈറ്റ് അൽയൂം’ എന്ന ഗസറ്റിൽ പ്രസിദ്ധീകരിച്ചിട്ടുണ്ട്. കെട്ടിട ഉടമകളുടെ സാക്ഷ്യപ്പെടുത്തലിന്റെ അടിസ്ഥാനത്തിലോ അല്ലെങ്കിൽ പ്രസ്തുത വിലാസങ്ങളിലുള്ള താമസ കെട്ടിടങ്ങൾ പൊളിച്ചുനീക്കിയതിനെ തുടർന്നോ ആണ് ഈ വിലാസങ്ങൾ റദ്ദാക്കിയതെന്ന് അതോറിറ്റി വ്യക്തമാക്കി.ഈ തീരുമാനത്തിൽ ഉൾപ്പെട്ടിട്ടുള്ള വ്യക്തികൾ തങ്ങളുടെ സിവിൽ ഐഡി വിവരങ്ങൾ എത്രയും വേഗം പുതുക്കേണ്ടതുണ്ട്. ആവശ്യമായ രേഖകൾ സഹിതം ‘സഹൽ’ മൊബൈൽ ആപ്ലിക്കേഷൻ വഴി പുതിയ വിലാസമോ അല്ലെങ്കിൽ തിരുത്തിയ വിവരങ്ങളോ രജിസ്റ്റർ ചെയ്യണമെന്ന് അധികൃതർ നിർദ്ദേശിച്ചു.
വിജ്ഞാപനം വന്ന് 30 ദിവസത്തിനകം ഈ നടപടിക്രമങ്ങൾ പൂർത്തിയാക്കേണ്ടതാണ്. നിർദ്ദിഷ്ട സമയപരിധിക്കുള്ളിൽ വിലാസം പുതുക്കുന്നതിൽ പരാജയപ്പെടുന്നവർക്കെതിരെ 1982-ലെ 32-ാം നമ്പർ നിയമത്തിലെ വകുപ്പ് 33 പ്രകാരം നിയമനടപടികൾ സ്വീകരിക്കും. ഇത് ലംഘിക്കുന്നവർക്ക് 100 കുവൈറ്റ് ദിനാർ വരെ പിഴ ചുമത്തുമെന്നും, ലംഘനം നടത്തുന്ന വ്യക്തികളുടെ എണ്ണത്തിനനുസരിച്ച് ശിക്ഷാ നടപടികൾ വർദ്ധിക്കുമെന്നും അതോറിറ്റി മുന്നറിയിപ്പ് നൽകി. സിവിൽ റെക്കോർഡുകൾ കൃത്യമായി സൂക്ഷിക്കേണ്ടതിന്റെ പ്രാധാന്യം ഓർമ്മിപ്പിച്ച അധികൃതർ, നിയമപരമായ പ്രത്യാഘാതങ്ങൾ ഒഴിവാക്കാൻ താമസക്കാർ കൃത്യസമയത്ത് തന്നെ വിവരങ്ങൾ പുതുക്കണമെന്ന് അഭ്യർത്ഥിച്ചു.
