കുവൈത്ത്സിറ്റി: രാജ്യത്ത് വിവിധ മയക്കുമരുന്ന് കേസുകളിൽ കോടതി കടുത്ത ശിക്ഷാവിധികളുമായി മുന്നോട്ട്. ഹെറോയിൻ കടത്തിയ കേസിൽ പിടിയിലായ ഇന്ത്യൻ പൗരന് കോടതി വധശിക്ഷ വിധിച്ചു. ആന്റി നാർക്കോട്ടിക് ഡിപ്പാർട്ട്മെന്റിന്റെ പിടിയിലായ പ്രതി, പബ്ലിക് പ്രോസിക്യൂഷന് മുന്നിൽ കുറ്റം സമ്മതിച്ചിരുന്നു. കുവൈറ്റിലെ ശക്തമായ മയക്കുമരുന്ന് വിരുദ്ധ നിയമപ്രകാരമുള്ള കടുത്ത ശിക്ഷകളിലൊന്നാണിത്.
മറ്റൊരു കേസിൽ, വിമാനത്താവള സുരക്ഷാ വിഭാഗത്തിൽ ജോലി ചെയ്തിരുന്ന കുവൈത്ത് പൗരന് 15 വർഷം തടവും 100,000 കുവൈത്തി ദിനാർ പിഴയും കോടതി വിധിച്ചു. ഈജിപ്തിൽ നിന്ന് മടങ്ങിയെത്തിയ ഇയാളുടെ പക്കൽ നിന്ന് വിൽപനയ്ക്കായി കൊണ്ടുവന്ന 1,903 ക്യാപ്സ്യൂൾ മയക്കുമരുന്ന് പിടികൂടിയിരുന്നു. വിമാനത്താവളം വഴി നടന്ന ലഹരിക്കടത്താണ് കടുത്ത ശിക്ഷയ്ക്ക് കാരണമായത്.
കൂടാതെ, മറ്റൊരു ലഹരി കേസിൽ സുരക്ഷാ ഉദ്യോഗസ്ഥന് നാല് വർഷം തടവും 1,000 കുവൈത്തി ദിനാർ പിഴയും കോടതി വിധിച്ചിട്ടുണ്ട്. കൈവശം ഹാഷിഷ് സൂക്ഷിച്ചതിനും, മെത്താംഫെറ്റാമൈൻ, ആംഫെറ്റാമൈൻ തുടങ്ങിയ ലഹരി വസ്തുക്കൾ വ്യക്തിഗത ആവശ്യത്തിനായി കൈവശം വെച്ചതിനുമാണ് ഈ ശിക്ഷ. രാജ്യത്ത് മയക്കുമരുന്ന് വ്യാപനത്തിനെതിരെ പൊലീസും നീതിന്യായ വ്യവസ്ഥയും കർശന നടപടികളാണ് സ്വീകരിച്ചുവരുന്നത്.
