കുവൈത്ത്സിറ്റി: യാത്രക്കാർക്കായി പ്രത്യേക വേനൽക്കാല ഓഫറുമായി ജസീറ എയർവേയ്സ്. ‘Buy Now, Fly Now’ എന്ന പുതിയ പ്രമോഷണൽ ക്യാംപെയിനിലൂടെ എയർലൈൻ ശൃംഖലയിലെ എല്ലാ ലക്ഷ്യസ്ഥാനങ്ങളിലേക്കുമുള്ള ടിക്കറ്റ് നിരക്കുകളിൽ 20 ശതമാനം വരെ ഇളവ് പ്രഖ്യാപിച്ചു.ജൂൺ 2 മുതൽ 6 വരെ ബുക്ക് ചെയ്യുന്ന യാത്രക്കാർക്കാണ് ഈ പ്രത്യേക ഓഫർ ലഭിക്കുക. ഓഫർ പ്രകാരമുള്ള യാത്രകൾ ജൂൺ 3 മുതൽ 30 വരെ നടത്താം.വേനൽ അവധിക്കാല യാത്രകളും കുടുംബസംഗമങ്ങളും ബിസിനസ് യാത്രകളും കൂടുതൽ ചെലവുകുറച്ച് ആസൂത്രണം ചെയ്യാൻ ഈ ഓഫർ സഹായകരമാകുമെന്ന് ജസീറ എയർവേയ്സ് അറിയിച്ചു.
കുവൈത്ത് അന്താരാഷ്ട്ര വിമാനത്താവളത്തിലെ ടെർമിനൽ 5 വഴി ജസീറ എയർവേയ്സ് മിഡിൽ ഈസ്റ്റ്, യൂറോപ്പ്, മധ്യ-ദക്ഷിണേഷ്യ എന്നിവിടങ്ങളിലെ നിരവധി വിനോദസഞ്ചാര, കുടുംബ, ബിസിനസ് കേന്ദ്രങ്ങളിലേക്ക് സർവീസ് നടത്തുന്നുണ്ട്. മിലാൻ ബെർഗാമോ, ലണ്ടൻ ലൂട്ടൺ, ബുഡാപെസ്റ്റ് എന്നിവയാണ് എയർലൈനിന്റെ ഏറ്റവും പുതിയ യൂറോപ്യൻ ലക്ഷ്യസ്ഥാനങ്ങൾ.
ജസീറ എയർവേയ്സിന്റെ ചീഫ് കൊമേഴ്സ്യൽ ഓഫീസർ പോൾ കാരോൾ പറഞ്ഞു: “യാത്രക്കാർക്ക് വർഷം മുഴുവൻ സൗകര്യപ്രദവും ചെലവുകുറഞ്ഞതുമായ യാത്രാ അവസരങ്ങൾ നൽകാൻ ഞങ്ങൾ പ്രതിജ്ഞാബദ്ധരാണ്. ഈ ഓഫറിലൂടെ വേനൽക്കാലത്ത് പുതിയ ലക്ഷ്യസ്ഥാനങ്ങൾ സന്ദർശിക്കാനും പ്രത്യേക കിഴിവുകൾ പ്രയോജനപ്പെടുത്താനും കഴിയും.”യാത്രക്കാർക്ക് ജസീറ എയർവേയ്സിന്റെ ഔദ്യോഗിക വെബ്സൈറ്റ്, മൊബൈൽ ആപ്പ്, അല്ലെങ്കിൽ 177 എന്ന കസ്റ്റമർ സർവീസ് നമ്പർ വഴി ടിക്കറ്റുകൾ ബുക്ക് ചെയ്ത് ഓഫർ പ്രയോജനപ്പെടുത്താമെന്ന് കമ്പനി അറിയിച്ചു.
