കുവൈറ്റ് സിറ്റി: ജഹ്റ ഗവർണറേറ്റ് മുൻസിപ്പാലിറ്റി പരിധിയിലെ വിവിധ നിർമ്മാണ മേഖലകളിൽ സുരക്ഷാ മാനദണ്ഡങ്ങൾ ഉറപ്പുവരുത്തുന്നതിനായി നടത്തിയ കർശന പരിശോധനകളിൽ 135 സുരക്ഷാ മുന്നറിയിപ്പുകൾ നൽകുകയും 23 നിയമലംഘനങ്ങൾ രജിസ്റ്റർ ചെയ്യുകയും ചെയ്തു. കെട്ടിട നിർമ്മാണ സ്ഥലങ്ങളിലെ സുരക്ഷാ വീഴ്ചകൾ കണ്ടെത്താനും സുരക്ഷാ ക്രമീകരണങ്ങൾ കൃത്യമാണോ എന്ന് ഉറപ്പുവരുത്താനും നിയമലംഘകർക്കെതിരെ കർശന നിയമനടപടികൾ സ്വീകരിക്കാനുമാണ് ഈ ഫീൽഡ് പരിശോധനകൾ നടത്തിയതെന്ന് ജഹ്റ മുൻസിപ്പാലിറ്റി സേഫ്റ്റി ഡിപ്പാർട്ട്മെന്റ് ഡയറക്ടർ എഞ്ചിനീയർ അൽ ഹുമൈദി അൽ മുതൈരി അറിയിച്ചു.
അംഗീകൃത മുൻസിപ്പാലിറ്റി നിയമങ്ങൾ പാലിക്കുന്നുണ്ടെന്ന് ഉറപ്പാക്കാനും നിർമ്മാണ മേഖലയിലെ നിയമലംഘനങ്ങൾ തടയാനുമായി പരിശോധനാ സംഘങ്ങൾ തങ്ങളുടെ പരിധിയിലുള്ള പ്രദേശങ്ങളിൽ പതിവായി ഫീൽഡ് ടൂറുകൾ നടത്തിവരികയാണെന്ന് അദ്ദേഹം വിശദീകരിച്ചു.
സാദ് അൽ അബ്ദുള്ള സിറ്റിയിൽ നടത്തിയ ഏറ്റവും പുതിയ പരിശോധനയിലാണ് നിർമ്മാണ സാമഗ്രികളും അവശിഷ്ടങ്ങളും കെട്ടിടങ്ങൾക്ക് മുന്നിൽ അലക്ഷ്യമായി തള്ളിയതുമായി ബന്ധപ്പെട്ട് 23 നിയമലംഘനങ്ങൾ രേഖപ്പെടുത്തിയതും തുടർനടപടികളുടെ ഭാഗമായി 135 സ്ഥാപനങ്ങൾക്ക് മുന്നറിയിപ്പ് നോട്ടീസ് നൽകിയതും. പൊതുജനങ്ങളുടെ സുരക്ഷ മുൻനിർത്തി വരും ദിവസങ്ങളിലും പരിശോധനകൾ തുടരുമെന്ന് അധികൃതർ വ്യക്തമാക്കി.
