കുവൈറ്റ് സിറ്റി: വൈദ്യുതി, ജലം, പുനരുപയോഗ ഊർജ്ജ മന്ത്രാലയത്തിന്റെ ആവശ്യപ്രകാരം രാജ്യത്തെ മുഴുവൻ ഗവർണറേറ്റുകളിലുമുള്ള തെരുവ് വിളക്കുകൾ മാറ്റിസ്ഥാപിക്കുന്നതിനുള്ള നിർണ്ണായക ടെൻഡർ സെൻട്രൽ ഏജൻസി ഫോർ പബ്ലിക് ടെൻഡേഴ്സ് പുറപ്പെടുവിച്ചു. നിലവിലുള്ള നെറ്റ്വർക്കുകളിലെ പരമ്പരാഗത വിളക്കുകൾ മാറ്റി ഊർജ്ജക്ഷമതയുള്ള എൽഇഡി ലൈറ്റിംഗ് സംവിധാനങ്ങൾ വിതരണം ചെയ്യാനും സ്ഥാപിക്കാനുമുള്ള പദ്ധതിയുടെ രണ്ടാം ഘട്ടത്തിനായാണ് ഇപ്പോൾ ടെൻഡർ ക്ഷണിച്ചിരിക്കുന്നത്.
ഈ ടെൻഡറിൽ പങ്കെടുക്കാൻ താൽപ്പര്യമുള്ള കമ്പനികൾക്കും സ്ഥാപനങ്ങൾക്കും സെൻട്രൽ ഏജൻസി ഫോർ പബ്ലിക് ടെൻഡേഴ്സ് ഓഫീസിൽ നിന്ന് ആവശ്യമായ രേഖകൾ കൈപ്പറ്റാവുന്നതാണെന്നും, അംഗീകൃത നിബന്ധനകൾക്കും വ്യവസ്ഥകൾക്കും വിധേയമായി പങ്കാളിത്ത നടപടികൾ പൂർത്തിയാക്കാവുന്നതാണെന്നും ഏജൻസി വ്യക്തമാക്കി.പൊതു ലൈറ്റിംഗ് ശൃംഖലകൾ ആധുനികവത്കരിക്കാനും അവയുടെ പ്രവർത്തനക്ഷമത വർദ്ധിപ്പിക്കാനുമുള്ള മന്ത്രാലയത്തിന്റെ ഊർജ്ജിത ശ്രമങ്ങളുടെ ഭാഗമായാണ് ഈ പദ്ധതി നടപ്പിലാക്കുന്നത്.
പഴയ പരമ്പരാഗത സ്പോട്ട്ലൈറ്റുകൾക്ക് പകരം കുറഞ്ഞ വൈദ്യുതി മാത്രം ഉപയോഗിക്കുന്ന എൽഇഡി ലൈറ്റുകൾ സ്ഥാപിക്കുന്നതിലൂടെ രാജ്യത്തെ മൊത്തം വൈദ്യുതി ഉപഭോഗം ഗണ്യമായി കുറയ്ക്കാനും, പ്രവർത്തന-പരിപാലന ചെലവുകൾ ലാഭിക്കാനും സാധിക്കും. അതോടൊപ്പം രാജ്യത്തെ വിവിധ പ്രദേശങ്ങളിലെ വെളിച്ച സംവിധാനം കൂടുതൽ മെച്ചപ്പെടുത്താനും ഈ പദ്ധതി സഹായിക്കുമെന്ന് മന്ത്രാലയം കൂട്ടിച്ചേർത്തു.
