കുവൈറ്റ് സിറ്റി: കുവൈറ്റ് മുൻസിപ്പാലിറ്റിയുടെ മുബാറക് അൽ-കബീർ ഗവർണറേറ്റ് ശാഖയിലെ പബ്ലിക് ഹൈജീൻ ആൻഡ് റോഡ് ഒക്യുപൻസി ഡിപ്പാർട്ട്മെന്റിന്റെ ഫീൽഡ് ടീമുകൾ റസിഡൻഷ്യൽ മേഖലകളിൽ പരിശോധന കർശനമാക്കി. പൊതുശുചിത്വം ഉറപ്പാക്കുന്നതിനും റോഡരികിലെ അനധികൃത കൈയേറ്റങ്ങൾ ഒഴിവാക്കുന്നതിനുമായി നടത്തുന്ന നിരന്തരമായ ശ്രമങ്ങളുടെ ഭാഗമായാണ് ഈ കാമ്പെയ്ൻ എന്ന് മുൻസിപ്പാലിറ്റിയുടെ പബ്ലിക് റിലേഷൻസ് ഡിപ്പാർട്ട്മെന്റ് അറിയിച്ചു.
സമീപദിവസങ്ങളിൽ നടത്തിയ ശക്തമായ പരിശോധനയിൽ വഴിയോരങ്ങളിൽ ഉപേക്ഷിക്കപ്പെട്ട നിലയിൽ കണ്ടെത്തിയ 11 സ്ക്രാപ്പ് വാഹനങ്ങളും 2 ബോട്ടുകളും ഒരു കാരവാനും മുൻസിപ്പാലിറ്റി സംഘം പിടിച്ചെടുത്ത് മുൻസിപ്പൽ ഇമ്പൗണ്ട് ലോട്ടിലേക്ക് മാറ്റി. ഇതോടൊപ്പം പൊതുശുചിത്വവും റോഡ് കൈയേറ്റവുമായി ബന്ധപ്പെട്ട ചട്ടങ്ങൾ ലംഘിച്ചതിന് 15 നിയമലംഘനങ്ങൾ രജിസ്റ്റർ ചെയ്യുകയും, ഉപേക്ഷിക്കപ്പെട്ട വാഹനങ്ങളും വാണിജ്യ കണ്ടെയ്നറുകളും നീക്കം ചെയ്യുന്നതിനായി 19 നോട്ടീസുകൾ നൽകുകയും ചെയ്തു.
ശുചിത്വ സേവനങ്ങൾ മെച്ചപ്പെടുത്തുന്നതിന്റെ ഭാഗമായി വിവിധ പ്രദേശങ്ങളിലെ 24 പഴയ മാലിന്യ നിക്ഷേപ പാത്രങ്ങൾ മാറ്റി പുതിയവ സ്ഥാപിച്ചിട്ടുണ്ട്. റസിഡൻഷ്യൽ പരിസരങ്ങളുടെ ഭംഗി നിലനിർത്താനും ഗതാഗതത്തിനും ജനങ്ങളുടെ സുഗമമായ സഞ്ചാരത്തിനും തടസ്സമാകുന്ന തടസ്സങ്ങൾ ഇല്ലാതാക്കാനും ലക്ഷ്യമിട്ടാണ് ഈ ശുചീകരണ ക്യാമ്പയിൻ നടപ്പിലാക്കുന്നതെന്ന് മുൻസിപ്പാലിറ്റി അധികൃതർ വ്യക്തമാക്കി.
