കുവൈത്ത് സിറ്റി, ഓഗസ്റ്റ് 29: കുവൈത്തിലെ ഫ്രീലാൻസ് ബിസിനസ് ലൈസൻസിംഗ് നിയമങ്ങളിൽ സുപ്രധാന മാറ്റങ്ങൾ കൊണ്ടുവരുന്നത് വാണിജ്യ-വ്യവസായ മന്ത്രാലയം പരിഗണിക്കുന്നു. സർക്കാർ ജീവനക്കാർ ഉൾപ്പെടെ കൂടുതൽ വിഭാഗങ്ങൾക്ക് ഫ്രീലാൻസ് ബിസിനസുകൾ സ്വന്തമാക്കാൻ അവസരം നൽകുന്നതാണ് പ്രധാന നിർദേശങ്ങളിലൊന്ന്.
നിലവിൽ കൺസൾട്ടൻസി, സോഫ്റ്റ്വെയർ ഡിസൈൻ-പ്രോഗ്രാമിംഗ്, വെബ്സൈറ്റ് ഡെവലപ്മെന്റ്, ഫാഷൻ-വസ്ത്ര ഡിസൈൻ, ജ്വല്ലറി ഡിസൈൻ, ഇവന്റ് ഫോട്ടോഗ്രഫി തുടങ്ങിയ ഏകദേശം 120 പ്രവർത്തനങ്ങളാണ് ഫ്രീലാൻസ് ബിസിനസ് വിഭാഗത്തിൽ ഉൾപ്പെടുന്നത്. ഓഫീസ് അല്ലെങ്കിൽ ഷോപ്പ് പോലുള്ള പരമ്പരാഗത വാണിജ്യസ്ഥാപനം ആവശ്യമില്ലാതെ ചെറിയ തോതിൽ നടത്താവുന്ന ബിസിനസുകളാണ് ഈ വിഭാഗത്തിലുള്ളത്.
പുതിയ നിർദേശം അംഗീകരിക്കപ്പെട്ടാൽ കുവൈത്തി സർക്കാർ ജീവനക്കാർക്കും ഫ്രീലാൻസ് ബിസിനസ് ലൈസൻസ് സ്വന്തമാക്കാൻ സാധിക്കും. നിലവിലെ വ്യവസ്ഥ പ്രകാരം സർക്കാർ ജീവനക്കാർക്ക് ഇത്തരം ഫ്രീലാൻസ് ബിസിനസുകൾ സ്വന്തമാക്കാൻ അനുമതിയില്ല. വിരമിച്ചവർക്കും സ്വകാര്യ മേഖലയിൽ ജോലി ചെയ്യുന്നവർക്കും നിശ്ചിത വ്യവസ്ഥകളോടെ ഈ മേഖലയിലേക്ക് കൂടുതൽ അവസരം നൽകുന്നതും പരിഗണനയിലുണ്ട്.
ബിസിനസ് ഉടമ തന്നെ സ്ഥാപനത്തിന്റെ മാനേജരാകണമെന്ന നിലവിലെ രീതിയിലും മാറ്റം വന്നേക്കും. ഉടമസ്ഥാവകാശത്തിൽ പങ്കില്ലാത്ത യോഗ്യനായ മറ്റൊരു കുവൈത്തി പൗരനെ മാനേജറായി നിയമിക്കാൻ അനുവദിക്കുന്നതാണ് മറ്റൊരു പ്രധാന നിർദേശം. ഇതിലൂടെ ഉടമസ്ഥതയും മാനേജ്മെന്റും വേർതിരിച്ച് ബിസിനസ് നടത്തുന്നതിന് കൂടുതൽ സൗകര്യം ലഭിക്കും.
അതേസമയം, ചില പ്രൊഫഷണൽ, സ്പെഷ്യലൈസ്ഡ് പ്രവർത്തനങ്ങൾക്ക് ലൈസൻസ് അനുവദിക്കുമ്പോൾ ബന്ധപ്പെട്ട യൂണിവേഴ്സിറ്റി ബിരുദമോ പ്രത്യേക യോഗ്യതയോ നിർബന്ധമാക്കാനും മന്ത്രാലയം ആലോചിക്കുന്നുണ്ട്. കൺസൾട്ടൻസി ഉൾപ്പെടെയുള്ള മേഖലകളിൽ സേവനം നൽകുന്നവർക്ക് ആവശ്യമായ വിദ്യാഭ്യാസ-സാങ്കേതിക യോഗ്യത ഉറപ്പാക്കുകയാണ് ലക്ഷ്യം.എന്നാൽ ഇവ ഇപ്പോൾ പഠന-പരിഗണന ഘട്ടത്തിലുള്ള നിർദേശങ്ങളാണ്; അന്തിമമായി അംഗീകരിച്ച പുതിയ നിയമങ്ങളല്ല. അംഗീകാരം ലഭിച്ചാൽ കുവൈത്തിലെ ചെറുകിട, ഫ്രീലാൻസ് സംരംഭക മേഖലയ്ക്ക് കൂടുതൽ അവസരങ്ങൾ തുറക്കുന്നതായിരിക്കും പുതിയ പരിഷ്കാരങ്ങൾ.
