കുവൈറ്റ് സിറ്റി: പ്രാദേശിക വിപണികളിൽ സുലഭമായ അളവിൽ മീനും ചെമ്മീനും ലഭ്യമാണെന്നും ഉപഭോക്താക്കൾക്ക് താങ്ങാനാവുന്ന വിലയിലാണ് ഇവ വിറ്റഴിക്കുന്നതെന്നും കുവൈറ്റ് ഫിഷർമെൻ യൂണിയൻ മേധാവി അബ്ദുള്ള അൽ സർഹീദ് അറിയിച്ചു. ഓഗസ്റ്റ് ആദ്യം ആരംഭിച്ച ചെമ്മീൻ വേട്ട സീസണിന്റെ ആദ്യ മാസത്തിൽ ഏകദേശം 555 ടൺ കുവൈറ്റി ചെമ്മീൻ വിപണിയിലെത്തിച്ചതായി അദ്ദേഹം വെളിപ്പെടുത്തി. അൽ ജരീദയ്ക്ക് നൽകിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്.
ലഭ്യമായ ആകെ അളവിൽ 530 ടൺ ‘ഉമ്മു നഈറ’ ചെമ്മീനും 25 ടൺ ‘ഷഹാമിയ’ ചെമ്മീനുമാണ് ഉൾപ്പെടുന്നത്. വരും ഡിസംബർ അവസാനം വരെ നീണ്ടുനിൽക്കുന്ന പ്രാദേശിക മീൻപിടുത്ത സീസണിലുടനീളം വിപണിയിൽ ചെമ്മീൻ ലഭ്യത ഉറപ്പാക്കാൻ ഇത് സഹായിക്കും. നിലവിൽ ആവർത്തിച്ച് വിപണിയിലേക്ക് ധാരാളം ‘സുബൈദി’ (ആവോലി) മീനുകൾ എത്തുന്നുണ്ടെന്നും അദ്ദേഹം ചൂണ്ടിക്കാട്ടി.
അതേസമയം, ഉയർന്ന അന്തരീക്ഷ താപനില കാരണം ‘മെയ്ദ്’ (മത്തി/നെയ്മീൻ) മീനുകളുടെ ലഭ്യതയിൽ കുറവുണ്ടായിട്ടുണ്ട്. എന്നാൽ താപനില കുറയുന്നതോടെ ഇവയുടെ ലഭ്യത ഘട്ടംഘട്ടമായി വർദ്ധിക്കുമെന്നും, ഒക്ടോബർ തുടക്കത്തോടെ ആവശ്യത്തിന് ‘മെയ്ദ്’ മീനുകൾ വിപണിയിൽ ലഭ്യമാകുമെന്നും അബ്ദുള്ള അൽ സർഹീദ് കൂട്ടിച്ചേർത്തു.
