കുവൈത്ത്: രാജ്യത്തെ പ്രധാന റോഡുകളിലും ഹൈവേകളിലും ട്രാഫിക് വിഭാഗം നടത്തിയ വ്യാപക പരിശോധനയിൽ 320 ട്രാഫിക് നിയമലംഘനങ്ങൾ കണ്ടെത്തുകയും 79 വാഹനങ്ങൾ പിടിച്ചെടുക്കുകയും ചെയ്തു.
റോഡ് സുരക്ഷ ശക്തമാക്കുന്നതിനും അപകടകരമായ ഡ്രൈവിംഗ് രീതികൾ തടയുന്നതിനുമായി ആഭ്യന്തര മന്ത്രാലയത്തിന് കീഴിലുള്ള ജനറൽ ട്രാഫിക് ഡിപ്പാർട്ട്‌മെന്റാണ് രാജ്യവ്യാപകമായി പരിശോധന നടത്തിയത്.അമിതവേഗത്തിൽ വാഹനമോടിക്കൽ, എമർജൻസി ലെയിനുകളിലൂടെ വാഹനങ്ങൾ ഓടിക്കൽ, നിയമവിരുദ്ധമായി ഓവർടേക്ക് ചെയ്യൽ തുടങ്ങിയ നിയമലംഘനങ്ങളാണ് പ്രധാനമായും കണ്ടെത്തിയത്.പരിശോധനയ്ക്കിടെ വിവിധ നിയമലംഘനങ്ങളിൽ ഉൾപ്പെട്ട 79 വാഹനങ്ങൾ അധികൃതർ പിടിച്ചെടുത്ത് ഇംപൗണ്ട്മെന്റ് ഗാരേജിലേക്ക് മാറ്റി. നിയമലംഘകർക്കെതിരെ ആവശ്യമായ നിയമനടപടികളും സ്വീകരിച്ചു.
റോഡപകടങ്ങൾ കുറയ്ക്കുന്നതിനും വാഹനയാത്രക്കാരുടെയും കാൽനടയാത്രക്കാരുടെയും സുരക്ഷ ഉറപ്പാക്കുന്നതിനുമായി കുവൈത്തിന്റെ വിവിധ ഭാഗങ്ങളിൽ ശക്തമായ ട്രാഫിക് പരിശോധനകൾ തുടരുമെന്ന് ട്രാഫിക് ആൻഡ് ഓപ്പറേഷൻസ് വിഭാഗം അറിയിച്ചു.ട്രാഫിക് നിയമങ്ങൾ കർശനമായി പാലിക്കണമെന്നും അമിതവേഗം, എമർജൻസി ലെയിനുകളുടെ ദുരുപയോഗം, അപകടകരമായ ഓവർടേക്കിംഗ് തുടങ്ങിയ നിയമലംഘനങ്ങൾ ഒഴിവാക്കണമെന്നും അധികൃതർ വാഹനമോടിക്കുന്നവരോട് ആവശ്യപ്പെട്ടു.
