ക്രിക്കറ്റ് ലോകം ആകാംഷയോടെ കാത്തിരിക്കുന്ന ഐപിഎൽ മെഗാ താരലേലത്തിന് ഇന്ന് തുടക്കമാവും. ഇന്നും നാളെയുമായി ബെംഗളൂരുവിൽ വെച്ചാണ് ലേലം നടക്കുക. ഉച്ചയ്ക്ക് 11 മണിക്ക് ലേലം തുടങ്ങും.പത്തു ടീമുകളിലേക്കായി ആകെ 590 താരങ്ങളാണ് ലേലത്തിനുള്ളത്. ഇതിൽ 370 ഇന്ത്യൻ താരങ്ങളും 220 വിദേശ കളിക്കാരും ഉണ്ട്. ഇതിൽതന്നെ 228 പേർ ദേശീയ ടീമുകളിൽ കളിച്ചവരും 355 പേർ കളിക്കാത്തവരുമാണ്. ഏഴ് അസോസിയേറ്റ് രാജ്യങ്ങളിൽ നിന്നുള്ള താരങ്ങളുമുണ്ട്. കേരള ടീമിൽ നിന്ന് ശ്രീശാന്ത് ഉൾപ്പടെ പതിമൂന്ന് താരങ്ങളും ലേലത്തിനുണ്ട്.ആകെ 161 കളിക്കാരാണ് ആദ്യ ദിനം ഫ്രാഞ്ചൈസികൾക്ക് മുന്നിലെത്തുക. സീനിയർ ഓപ്പണർ ശിഖർ ധവാനും ശ്രേയസ് അയ്യരും ഉൾപ്പെടെയുള്ള മുൻനിര ഇന്ത്യൻ താരങ്ങളും പാറ്റ് കമ്മിൻസ്, കാഗിസോ റബാഡ തുടങ്ങിയ വിദേശ താരങ്ങൾ രണ്ടു കോടി അടിസ്ഥാന വിലയിൽ ഫ്രാഞ്ചൈസികൾക്ക് മുന്നിലെത്തും. ആകെ 48 പേരാണ് രണ്ട് കോടി രൂപ പട്ടികയിൽ വരുന്നത്.അതേ കൂട്ടത്തിൽ വരുന്ന മുതിർന്ന ഇന്ത്യൻ താരങ്ങളായ മുഹമ്മദ് ഷമി, ഭുവനേശ്വർ കുമാർ, ഉമേഷ് യാദവ്, അശ്വിൻ, ഇഷാന്ത് ശർമ, അജിങ്ക്യ രഹാനെ എന്നിവരും ആദ്യ ദിനം ലേലത്തിനുണ്ടാകും. യുവതാരങ്ങളായ ഇഷാൻ കിഷൻ, ദേവദത്ത് പടിക്കൽ, വാഷിംഗ്ടൺ സുന്ദർ, ദീപക് ചാഹർ, കഴിഞ്ഞ സീസണിലെ മികച്ച വിക്കറ്റ് വേട്ടക്കാരൻ ഹർഷൽ പട്ടേൽ, സ്പിന്നർ യുസ്‌വേന്ദ്ര ചാഹൽ, ഫാസ്റ്റ് ബൗളർ ശാർദുൽ ഠാക്കൂർ എന്നിവർക്കായി വാശിയേറിയ ലേലം കാണാനാകും.വിദേശ താരങ്ങളായ പേസർ ട്രെന്റ് ബോൾട്ട്, കമ്മിൻസ്, റബാഡ, ഓസ്‌ട്രേലിയൻ ഓൾറൗണ്ടർ മിച്ചൽ മാർഷ്, സ്റ്റീവ് സ്മിത്ത്, മുൻ ബംഗ്ലാദേശ് നായകൻ ഷാക്കിബ് അൽ ഹസൻ, ദക്ഷിണാഫ്രിക്കൻ താരം ഫാഫ് ഡു പ്ലെസിസ് എന്നിവരും ആദ്യ ദിനം ലേലത്തിനുണ്ടാകും. ഇവർക്ക് പിന്നാലെ ഫ്രാഞ്ചൈസികൾ എത്തുമെന്നാണ് പ്രതീക്ഷിക്കുന്നത്.1.5 കോടി രൂപ അടിസ്ഥാന വിലയുള്ള 20 താരങ്ങളും ഒരു കോടി രൂപ വിലയുള്ള 34 പേരുമാണ് ലേലത്തിനുള്ളത്. ഷാരൂഖ് ഖാൻ, ദീപക് ഹൂഡ, ആവേശ് ഖാൻ എന്നിവരെ കൂടാതെ ഇന്ത്യയുടെ അണ്ടർ-19 താരങ്ങളായ ക്യാപ്റ്റൻ യാഷ് ദുൽ, വിക്കി ഓസ്റ്റ്വാൾ, രാജ്വർധൻ ഹംഗാർഗേക്കർ എന്നിവരും ലേലത്തിനുണ്ട്.ദക്ഷിണാഫ്രിക്കയുടെ 42 കാരനായ സ്പിന്നർ ഇമ്രാൻ താഹിറാണ് ലേലത്തിലെ ഏറ്റവും പ്രായം കൂടിയ താരം. അഫ്ഗാനിസ്ഥാന്റെ 17 കാരനായ നൂർ അഹമ്മദാണ് ഏറ്റവും പ്രായം കുറഞ്ഞത്. വെസ്റ്റ് ഇൻഡീസിൽ നടക്കുന്ന അണ്ടർ 19 ലോകകപ്പിലാണ് നൂർ ഇപ്പോൾ കളിക്കുന്നത്.പഞ്ചാബ് കിംഗ്‌സിനാണ് ഏറ്റവും കൂടുതൽ താരങ്ങളെ വാങ്ങാനാവുക. 23 ഒഴിവുകളാണ് പഞ്ചാബിന് ഉള്ളത്, ചെന്നൈ സൂപ്പർ കിംഗ്‌സ്, ഡൽഹി ക്യാപിറ്റൽസ്, കൊൽക്കത്ത നൈറ്റ് റൈഡേഴ്‌സ്, മുംബൈ ഇന്ത്യൻസ് എന്നിവയ്ക്ക് 21 ഒഴിവുകളാണുള്ളത്. ബാക്കിയുള്ള ടീമുകൾക്ക് 22 ഒഴിവുകൾ വീതമുണ്ട്.പഞ്ചാബ് കിങ്സിന് 72 കോടി രൂപയാണ് ചെലവാക്കാനുള്ളത്. ഇതാണ് ഒരു ടീമിന്റെ പക്കലുള്ള ഏറ്റവും കൂടിയ തുക. ഏറ്റവും കുറവ് ഡൽഹി ക്യാപിറ്റൽസിനാണ്, 47.5 കോടി രൂപ.ഓസ്ട്രേലിയയിൽ നിന്നാണ് ഏറ്റവും കൂടുതൽ വിദേശ കളിക്കാർ ഉള്ളത്. 47 പേർ ഓസ്‌ട്രേലിയിൽ നിന്ന് പങ്കെടുക്കും. വെസ്റ്റ് ഇൻഡീസിൽ നിന്നുള്ള 34 താരങ്ങളും ലേലത്തിൽ മത്സരിക്കും. ദക്ഷിണാഫ്രിക്ക 33, ശ്രീലങ്ക 23, ഇംഗ്ലണ്ട് 24, ന്യൂസിലൻഡ് 24, അഫ്ഗാനിസ്ഥാന് 17 എന്നിങ്ങനെയാണ് മറ്റു രാജ്യങ്ങളിൽ നിന്നുള്ള താരങ്ങളുടെ എണ്ണം.എസ് ശ്രീശാന്ത്, റോബിന്‍ ഉത്തപ്പ, കേരള താരമായ ജലജ് സക്സേന, സച്ചിന്‍ ബേബി, എം.ഡി.നിധീഷ്, വിഷ്ണു വിനോദ് , ബേസില്‍ തമ്പി, മിഥുന്‍ എസ്, കെ.എം.ആസിഫ് മുഹമ്മദ് അസ്ഹറുദ്ദീന്‍, സിജോമോന്‍ ജോസഫ്, രോഹന്‍ കുന്നുമ്മൽ, ഷോൺ റോജര്‍ എന്നിവരാണ് കേരളത്തില്‍ നിന്ന് ലേലത്തില്‍ പങ്കെടുക്കുന്ന താരങ്ങള്‍.ഓരോ ടീമുകളും നിലനിർത്തിയിരിക്കുന്ന താരങ്ങൾ◾പഞ്ചാബ് കിങ്‌സ്: മായങ്ക് അഗർവാൾ, ഷർഷദീപ് സിങ്.◾സൺറൈസേഴ്‌സ് ഹൈദരാബാദ്: കെയ്ൻ വില്യംസൺ, ഉംറാൻ മാലിക്, അബ്ദുസ്സമദ്.◾രാജസ്ഥാൻ റോയൽസ്: സഞ്ജു സാംസൺ, ജോസ് ബട്‌ലർ, യശസ്വി ജെയ്‌സ്വാൾ.◾റോയൽ ചലഞ്ചേഴ്‌സ് ബാംഗ്ലൂർ: വിരാട് കോഹ്ലി, ഗ്ലെൻ മാക്‌സ്വെൽ, മുഹമ്മദ് സിറാജ്.◾മുംബൈ ഇന്ത്യൻസ്: രോഹിത് ശർമ, കീറൺ പൊള്ളാർഡ്, ജസ്പ്രീത് ബുംറ, സൂര്യകുമാർ യാദവ്.◾ചെന്നൈ സൂപ്പർ കിങ്‌സ്: എം.എസ്. ധോണി, രവീന്ദ്ര ജദേജ, മൊയീൻ അലി, ഋതുരാജ് ഗെയ്ക്വാദ്.◾കൊൽക്കത്ത നൈറ്റ് റൈഡേഴ്‌സ്: ആന്ദ്രെ റസൽ, സുനിൽ നരെയ്ൻ, വെങ്കിടേഷ് അയ്യർ, വരുൺ ചക്രവർത്തി.◾ഡൽഹി കാപിറ്റൽസ്:റിഷഭ് പന്ത്, അക്‌സർ പട്ടേൽ, പൃഥ്വി ഷാ, ആന്റിച് നോർട്യേ.◾ലഖ്‌നോ സൂപ്പർ ജയന്റ്‌സ്: ലോകേഷ് രാഹുൽ, മാർകസ് സ്റ്റോയ്‌നിസ്, രവി ബിഷ്‌ണോയ്.◾ഗുജറാത്ത് ടൈറ്റൻസ്: ഹർദിക് പാണ്ഡ്യ, റാഷിദ് ഖാൻ, ശുഭ്മൻ ഗിൽ
Lorem ipsum dolor sit amet, consectetur adipisicing elit. Velit omnis animi et iure laudantium vitae, praesentium optio, sapiente distinctio illo?