കുവൈത്ത്: ജലീബ് അൽ ഷുയൂഖ് മേഖലയിൽ മോഷണവും തീപിടിത്തവുമായി ബന്ധപ്പെട്ട നിരവധി പരാതികളുടെ പശ്ചാത്തലത്തിൽ കുവൈത്ത് ജനറൽ ഡിപ്പാർട്ട്മെന്റ് ഓഫ് ക്രിമിനൽ ഇൻവെസ്റ്റിഗേഷൻ നടത്തിയ വിപുലമായ സുരക്ഷാ പരിശോധനയിൽ 45 പേർ അറസ്റ്റിലായി.ആഭ്യന്തര മന്ത്രാലയം അറിയിച്ചതനുസരിച്ച്, പിടിയിലായവരിൽ 36 പേർ വിവിധ മിസ്സിംഗ് കേസുകളിൽ തിരയപ്പെട്ടിരുന്നവരാണ്. ഇവരിൽ നിയമവിരുദ്ധ ഗർഭധാരണവുമായി ബന്ധപ്പെട്ട കേസിൽ ഉൾപ്പെട്ട രണ്ട് സ്ത്രീകളും ഉണ്ടെന്ന് അധികൃതർ വ്യക്തമാക്കി. ഇവരെ ആവശ്യമായ നിയമനടപടികൾക്കായി മനുഷ്യക്കടത്തും നെഗറ്റീവ് ഫിനോമിനയും ചെറുക്കുന്നതിനുള്ള വിഭാഗത്തിലേക്ക് കൈമാറി.
പരിശോധനയിൽ മറ്റ് 9 പേർ വിവിധ കേസുകളിലും നിയമലംഘനങ്ങളിലും ഉൾപ്പെട്ടതായി കണ്ടെത്തി. കേബിളുകൾ, ചെമ്പ്, ഇരുമ്പ്, വാഹനങ്ങളുടെ എക്സ്ഹോസ്റ്റ് ഭാഗങ്ങൾ, സ്ത്രീകളുടെ ആഭരണങ്ങളും അനുബന്ധ വസ്തുക്കളും മോഷ്ടിച്ചതുമായി ബന്ധപ്പെട്ട കേസുകളും ഇതിൽ ഉൾപ്പെടുന്നു.
കൂടാതെ, ഒരാളെ പുകയില ഉൽപ്പന്നങ്ങളുമായി പിടികൂടിയതായും മറ്റൊരാളിൽ നിന്ന് ക്രിസ്റ്റൽ മെത്ത്, കെമിക്കൽ എന്നീ ലഹരിവസ്തുക്കളെന്ന് സംശയിക്കുന്ന പദാർത്ഥങ്ങൾ കണ്ടെത്തിയതായും ആഭ്യന്തര മന്ത്രാലയം അറിയിച്ചു.അറസ്റ്റിലായ എല്ലാവർക്കുമെതിരെ ആവശ്യമായ നിയമനടപടികൾ പൂർത്തിയാക്കി ബന്ധപ്പെട്ട അധികാരികൾക്ക് കൈമാറി. നാടുകടത്താൻ തീരുമാനിച്ചവർക്കെതിരായ നടപടികളും ആരംഭിച്ചതായി അധികൃതർ വ്യക്തമാക്കി.
