കുവൈത്ത് സിറ്റി: രാജ്യത്ത് പെയ്യുന്ന കനത്ത മഴയെ തുടർന്ന് വെള്ളക്കെട്ട് ഉയർന്ന സാഹചര്യത്തിൽ ചില പ്രധാന റോഡുകൾ താൽക്കാലികമായി അടച്ചതായി കുവൈത്ത് ആഭ്യന്തര മന്ത്രാലയം അറിയിച്ചു. പബ്ലിക് റിലേഷൻസും സുരക്ഷാ മാധ്യമവിഭാഗവും പുറത്തിറക്കിയ പ്രസ്താവനയിൽ, വെള്ളം നിറഞ്ഞ റോഡുകളും അടച്ച വഴികളും കാരണം യാത്രക്കാർ അതീവ ജാഗ്രത പാലിക്കണമെന്നും വാഹനമോടിക്കുമ്പോൾ ശ്രദ്ധിക്കണമെന്നും പൗരന്മാരോടും താമസക്കാരോടും അധികൃതർ ആവശ്യപ്പെട്ടു. ചില പ്രദേശങ്ങളിലെ പ്രവേശന-പുറത്തിറക്കുവഴികളും താൽക്കാലികമായി അടച്ചിട്ടുണ്ടെന്ന് അധികൃതർ അറിയിച്ചു.
ഗതാഗതം നിയന്ത്രിക്കുന്നതിനായി ചില വഴിതിരിവുകളും പ്രഖ്യാപിച്ചിട്ടുണ്ട്:
കിംഗ് അബ്ദുലസീസ് അൽ സൗദ് റോഡ് കുവൈത്ത് സിറ്റിയിൽ നിന്ന് വരുന്ന വാഹനങ്ങൾക്ക് അടച്ചിട്ടുണ്ട്. വാഹനങ്ങൾ സിക്സ് റിംഗ് റോഡ് വഴി ജഹ്റയിലേക്കാണ് തിരിച്ചു വിടുന്നത്.
കിംഗ് അബ്ദുലസീസ് അൽ സൗദ് റോഡിൽ നിന്ന് കുവൈത്ത് സിറ്റിയിലേക്കുള്ള ഗതാഗതം അൽ തഅവൂൺ സ്ട്രീറ്റിലേക്കും അവിടെ നിന്ന് അൽ ബിദാ റൗണ്ടബൗട്ടിലേക്കും തിരിച്ചുവിടും.
അൽ തഅവൂൺ സ്ട്രീറ്റിൽ നിന്ന് അൽ മെസ്സീല ഭാഗത്തേക്ക് വരുന്ന വാഹനങ്ങൾ കിംഗ് അബ്ദുലസീസ് അൽ സൗദ് റോഡിലൂടെ കുവൈത്ത് സിറ്റിയിലേക്കുള്ള വലത് വഴിയിലേക്ക് തിരിയേണ്ടതാണ്.
ജഹ്റയിൽ നിന്ന് സിക്സ് റിംഗ് റോഡിലൂടെ കിംഗ് അബ്ദുലസീസ് അൽ സൗദ് റോഡിലൂടെ ഫഹഹീലിലേക്കുള്ള രണ്ട് വലത് ബ്രാഞ്ചുകളും അടച്ചിട്ടുണ്ട്.
അത്യാവശ്യമായ സാഹചര്യമല്ലെങ്കിൽ വീടുകളിൽ തന്നെ തുടരണമെന്നും, ഗതാഗതനിയമങ്ങൾ പാലിക്കണമെന്നും, സുരക്ഷാ ഉദ്യോഗസ്ഥരുടെ നിർദേശങ്ങൾ അനുസരിക്കണമെന്നും ആഭ്യന്തര മന്ത്രാലയം പൊതുജനങ്ങളോട് അഭ്യർത്ഥിച്ചു. അടിയന്തര വാഹനങ്ങളുടെ ഗതാഗതം സുഗമമാക്കുന്നതിനും സുരക്ഷ ഉറപ്പാക്കുന്നതിനും ഇത് അനിവാര്യമാണെന്നും അധികൃതർ വ്യക്തമാക്കി.
നിലവിലെ പ്രതികൂല കാലാവസ്ഥയെ തുടർന്ന് റോഡുകളുടെ സ്ഥിതിഗതികൾ തുടർച്ചയായി നിരീക്ഷിച്ച് ആവശ്യമായ നടപടികൾ സ്വീകരിക്കുന്നതായി മന്ത്രാലയം അറിയിച്ചു.
