കുവൈറ്റ് സിറ്റി: ബനൈദ് അൽ-ഗർ മേഖലയിലെ നിർമ്മാണ പ്രവർത്തനങ്ങൾ കേന്ദ്രീകരിച്ച് കുവൈറ്റ് മുൻസിപ്പാലിറ്റി നടത്തിയ മിന്നൽ പരിശോധനയിൽ വിവിധ നിയമലംഘനങ്ങൾ കണ്ടെത്തി. മുൻസിപ്പാലിറ്റിയുടെ പബ്ലിക് റിലേഷൻസ് വിഭാഗവും ഇൻസ്പെക്ഷൻ ടീമുകളും സംയുക്തമായി നടത്തിയ പരിശോധനയിൽ മൂന്ന് നിയമലംഘനങ്ങൾക്ക് പിഴ ചുമത്തുകയും 14 കർശന മുന്നറിയിപ്പുകൾ നൽകുകയും ചെയ്തു. കെട്ടിട നിർമ്മാണ ചട്ടങ്ങൾ പാലിക്കപ്പെടുന്നുണ്ടെന്ന് ഉറപ്പാക്കുന്നതിനായി ആസൂത്രണം ചെയ്ത നിരീക്ഷണ ക്യാമ്പയിന്റെ ഭാഗമായാണ് ഉദ്യോഗസ്ഥർ സ്ഥലത്തെത്തിയത്.
ഇൻവെസ്റ്റ്മെന്റ് ഹൗസിംഗ് പ്രോജക്റ്റുകൾക്കും മറ്റ് കെട്ടിടങ്ങൾക്കും നിശ്ചയിച്ചിട്ടുള്ള നിർമ്മാണ രീതികളിൽ മാറ്റം വരുത്തിയതായും അനുവദിക്കപ്പെട്ട സ്ഥലങ്ങൾ അനധികൃതമായി ദുരുപയോഗം ചെയ്തതായും പരിശോധനയിൽ കണ്ടെത്തിയിട്ടുണ്ട്. കെട്ടിട നിർമ്മാണ സംവിധാനങ്ങളിലെ പിഴവുകളും സ്ഥലപരിമിതി സംബന്ധിച്ച ചട്ടങ്ങളുടെ ലംഘനവുമാണ് പ്രധാനമായും നടപടിക്ക് കാരണമായത്. നഗരാസൂത്രണ മാനദണ്ഡങ്ങൾ കൃത്യമായി പാലിക്കുന്നുണ്ടെന്ന് ഉറപ്പുവരുത്തുകയാണ് ഇത്തരം പരിശോധനകളിലൂടെ ലക്ഷ്യമിടുന്നതെന്ന് അധികൃതർ വ്യക്തമാക്കി.
