കുവൈത്ത് സിറ്റി: കമ്പനികൾക്കും ബിസിനസ്സ് ഉടമകൾക്കുമായി പബ്ലിക് അതോറിറ്റി ഫോർ മാൻപവർ പുതിയ പാക്കേജ് ഇലക്ട്രോണിക് സേവനങ്ങൾ പുറത്തിറക്കി. ഡിജിറ്റൽ പരിവർത്തനം പ്രോത്സാഹിപ്പിക്കുകയും തൊഴിലുടമകൾക്കുള്ള നടപടിക്രമങ്ങൾ ലളിതമാക്കുകയും ചെയ്യുക എന്ന ലക്ഷ്യത്തോടെ ‘അസ്ഹൽ’ പോർട്ടൽ വഴിയാണ് ഈ സേവനങ്ങൾ ലഭ്യമാക്കിയിരിക്കുന്നത്.
വിവിധ റെസിഡൻസി ആർട്ടിക്കിളുകൾക്ക് കീഴിലുള്ള പ്രവാസികൾക്കും അവരുടെ ബന്ധുക്കൾക്കുമായി വർക്ക് പെർമിറ്റുകൾ നൽകുന്നതിനും റദ്ദാക്കുന്നതിനും ഇനി മുതൽ ഈ പ്ലാറ്റ്ഫോം ഉപയോഗിക്കാം.പ്രധാനമായും സ്വദേശി പൗരന്മാരുടെ പങ്കാളികൾ, മക്കൾ, വിധവകൾ അല്ലെങ്കിൽ വിവാഹമോചിതർ എന്നിവർക്ക് പുറമെ മറ്റ് ബന്ധുക്കൾക്കും നിയമപരമായ പദവി ഭേദഗതി ചെയ്തവർക്കുമാണ് പുതിയ മാറ്റങ്ങൾ ഗുണകരമാകുക. മറ്റ് മേഖലകളിൽ നിന്നുള്ള വർക്ക് പെർമിറ്റ് കൈമാറ്റവും പ്രവാസികളുടെ വർക്ക് പെർമിറ്റ് റദ്ദാക്കലും പുതിയ സേവനങ്ങളിൽ ഉൾപ്പെടുന്നു. വർക്ക് പെർമിറ്റ് ട്രാൻസ്ഫർ നടപടികൾ പൂർത്തിയാക്കുന്നതിന് തൊഴിലാളി സാധുവായ താമസരേഖയോടും പാസ്പോർട്ടോടും കൂടി രാജ്യത്ത് ഉണ്ടായിരിക്കണമെന്നത് നിർബന്ധമാണ്.
കൂടാതെ ഫയലിലോ ലൈസൻസിലോ തൊഴിലാളിയുടെ പദവിയിലോ യാതൊരുവിധ നിയമപരമായ തടസ്സങ്ങളും ഉണ്ടായിരിക്കാൻ പാടില്ലെന്നും അതോറിറ്റി വ്യക്തമാക്കി. പെൻഡിംഗ് അപേക്ഷകളോ രാജ്യം വിടുന്നതിനുള്ള ഫൈനൽ ക്യാൻസലേഷനോ ഇല്ലാത്ത പക്ഷം മാത്രമേ ഈ സേവനം പ്രയോജനപ്പെടുത്താൻ സാധിക്കൂ. അതത് താമസരേഖയ്ക്ക് അനുസൃതമായി ബന്ധപ്പെട്ട അധികാരികളിൽ നിന്നുള്ള അംഗീകാരം നേടണമെന്നതിനൊപ്പം സ്വകാര്യ മേഖലയിലെ തൊഴിലാളികൾക്കായി നിശ്ചയിച്ചിട്ടുള്ള പൊതുവായ എല്ലാ വ്യവസ്ഥകളും പാലിച്ചിരിക്കണമെന്നും അതോറിറ്റി അറിയിച്ചു.
